Eskritór Júlio de Jesus.

Hosi:

Júlio de Jesus

Introdusaun

Edukasaun mak sai fatór determinante iha dezenvolvimentu ba Estadu partikularmente RDTL. Artigu ne’e tenta atu hakle’an konaba “ESCOLHA A VIDA DO PROFESSOR: Por serviço ou por Trabalho? é uma questão discutida com a responsabilidade do Governo” hodi haree ba realidade ne’ebé ohin loron ema barak tau hela iha kestaun no mos ukun na’in balun hahú preokupa. Sa lerek profesór? ho arogánsia husi ema balun mos husu nune’e maski nia la sukat no la sura profesór na’in hira mak tempra nia to’o hamrik ho sentidu iha rai nia leten ne’e.

Loos duni “ensinar é um dom da vocação” purtantu profesór ne’e ita bele bolu “vocacionado” hanesan mos Diogo aprezenta nia relatóriu depois de “estágio pedagógico” nia hakerek dehan “ser professor: a confirmação de uma vocação” (Diogo,2013). Se profesór ne’e hanesan vokasaun ida katak nia ne’e eskollidu atu serbí, nune’e la bele hein rekompensa bainhira hanorin. Maibé realidade hatudu oinseluk tanba profesór balun hatur-an hanesan fali “trabalhador” ne’ebé sira iha “trabalho” katak merese simu sira nia rekompensa. Ida ne’e sala? ita sei haree hamutuk iha konteúdu!

Objetivu (i) husi tema ne’ebé iha lori ita ba hatene konaba (serviço e trabalho) hodi haree profesór sira nia knaar maibé ita sei la ignora sira nia nesesidade hanesan joven “Feto ka Mane” hanesan mos ema ne’ebé “forma ona família”. Husi ne’e mak hodi tetu Governu nia pozisaun perante konseitu sira no realidade profesór sira nian bazeia ba mehi husi Estadu ida ne’e tuir (Lei Base da educação, Art. 40) ne’ebé hatur konaba polítika edukativa.

Objetivu (ii) mak ha’u nia kontribuisaun ida hanesan sidadaun ne’ebé hakarak hato’o mos nia hanoin ba Governu ho livre tuir lei ne’ebé konsagrada iha (CRDTL art.400 no.1) tanba “liberdade de expressão” ne’e la bele hetan bandu husi “qualquer tipo de censura” konforme no.2 husi artigu sitadu.

Komprensaun jerál konaba profesór

Profesór ne’e refere ba ema ne’ebé “por competência acadêmica” no “Chamado” atu sai naroman ba ema seluk ka transmite siénsia au mezmu tempu forma ema nia karakter ho valór pozitivu sira. Bainhira ita temi profesór iha ita nia kakutak ne’e mosu kedas “educação” tanba edukasaun hanesan prosesu ida hosi verbu “educar” no sé mak eduka ne’e “professor” nune’e mak “professor é mesmo como educador”. Dala ruma defísil atu aseita katak profesór ne’e bele sai edukadór ne’ebé di’ak maibé oinseluk se edukadór di’ak konserteza nia konsideradu hanesan profesór ne’ebé di’ak mos.

Filózofu no Edukadór Mário Sérgio Cortella fó nia vista iha maneira seluk uitoan dehan profesór ne’e la’ós “educar mas escolarizar” hodi fó esplikasaun ba termu rua “Educação e Escolarização” maibé aas liu tan ida ne’e mak “vocação”. Tuir Cortella bainhira ita dehan edukasaun la’ós refere ba prosesu eskolár maibé kabe liu ba kompeténsia família nian. Tanba primeira edukasaun ne’e mak uma “Inan no Aman” hanorin oinsá “respeitu, valór umanu, hadomi, kultura, kustume nst”. Oinseluk iha eskola, tanba alunu sira tama ona ba faze eskolarizasaun nune’e profesór haree liu ona ba aspetu kognitivu.

Jornál “Escola da Inteligência: Educação Socioemocional” públika artigu “ser professor é”, hateten “ser professor é uma profissão que exige muito esforço, preparo, conhecimento, mais ainda que requer compromisso e comprometimento” (EI/ES, 17-o8-2016). Husi ne’e ita hatene oinsá afirmasaun ba dedikasaun profesór sira nian iha misaun kmo’ok ne’e. Tanba profesór la’ós “sebatas profisi dalam konsep pekerjaan” maibé “compartilhar conhcimento” (Ibidem) ho alunu sira ka futuru nasaun ida nian.

Iha ita nia rain ema hirak ne’ebé ita hanaran “professor” ne’e baibain de’it maibé se ita haree fali nasaun avansada sira hanesan Japaun, Amerika, Ingleterra nst… sira tau importánsia ba profesór tanba husi sira mak sei hamosu ema matenek barak atu ukun, tékniku sira ne’ebé profisionál husi “diversas áreas do estudo”.

Rai foin ukun-an hanesan Timor ne’e ita sei mosu konfuzaun ba ita nia profesór sira tanba balun la dun tau interese ba alunu sira nia “desenvolvimento académico” maibé hanoin de’it osan fulan to’o ba foti iha “Banku”. Ema barak kestiona loos konaba konseitu “vokasaun” será ke ho profesór sira hanesan ne’e vokasaun laiha? ita sei haree hamutuk iha kraik.

Iha ita nia hanoin bainhira ita temi servisu katak interligadu kedas ho lia-fuan “serbí”. Iha teoria sira ne’ebé toka konaba lideransa termu “serbí” hola fatin importante. Tanba lideransa ne’ebé di’ak ne’e atu serbí la’ós atu ema gava ka atu hetan pozisaun di’ak. Maibé ha’u fiar katak profesór hatur-an ho Domin hanesan Cortella dehan “pedagogia do Amor” (Cortella, 2014, p.15) nune’e mos Pedágogu Brazileiru P.Freire hateten “Edução é um ato de Amor” (Freire,2015) mak ha’u hanoin katak profesór ne’e rasik sei konsege hatene “serviço” ne’ebé ita bele traduz ba “vocação”.

Loos duni katak fásil atu pronúnsia termu “Serbí” maibé tau iha prátika ha’u hanoin katak defísil tanba nesesita “boa vontade e paciência” hanesan Cortella dehan “paciência pedagógica” (Cortella, 2014, p.15) no ida ne’e duni mak karakter serbí nian hodi hatur saida mak servisu.

Bainhira ita temi traballu ne’e katak iha kedas relasaun ho saláriu. Nune’e hanoin simples karik ita dehan “ha’u halo tanba osan ka osan mak haruka ha’u halo”. Entaun iha ita nia rain profesór barak mak moris hela ho kondisaun ida ne’e. Sira la hatene? ha’u hanoin katak sira hotu hatene maibé ida ne’e “kestaun nesesidade”.

Loos duni ema balun dehan “la’ós osan mak bele halo buat hotu maibé realidade hatudu katak osan bele rezolve buat barak”, ema balun mos argumenta katak “la’ós osan mak halo ema kontente maibé realidade hatudu katak osan mos halo ema barak ona mak kontente”. Husi ne’e la sala se profesór sira presiza osan. Tanba saida? mai ita haree hamutuk kondisaun sira iha kraik!

Kondisaun profesór nian

Hanesan ita hotu hatene katak maske profesór ne’e hanesan vokasaun ida katak “dar e sem pensar a receber de novo ou sem esperar a recompênsa”. Ida ne’e hanesan natureza husi “amante do ensinar” maibé keta haluhan katak profesór hirak ne’e mos mai husi família no balun mos harii rasik ona família foun. Husi ne’e ezije persisténsia husi profesór sira atu tau iha hanoin “ha’u moris atu hanorin” maibé koloka mos konsiderasaun balun ba ukun na’in sira katak “professor sira mai husi família ida no balun hahú ona harii rasik sira nia família”.

Ne’e hatudu katak maske profesór ne’e vokasionadu maibé sira mos iha nesesidade ba sira nia moris. Ita presiza sai realístiku uitoan ba situasaun sira hanesan ne’e selae ita moris de’it iha konseitu no ita ignora tiha realidade prezente nian ne’ebé ita la’o hela. Ha’u hakarak hatur kondisaun sira ne’ebé oras ne’e daudaun ita nia profesór sira hasoru iha eskola no sira nia moris;

Distánsia husi uma ba eskola

Se ita haree ba realidade iha Timor liu-liu iha área rurál ne’ebá presiza tempu naruk atu to’o. Profesór to’o iha eskola nia enerjia atu transmite matéria menus tanba nia gasta barak ona iha dalan. Balun mai ho sira nia transporte privadu maibé presiza mos osan hodi sosa mina. Ema balun bele husu “be osan ida fulan-fulan simu ne’e oinsá?” ha’u sei hatan ba nia katak “na verdade osan ne’ebé mestri sira simu ne’e la konsege hatan ba nesesidade profesór sira nian”. Iha ne’e ema balun bele argumenta katak “profesór mak tenke buka fatin hodi hela besik eskola”, maibé la sala mos kuandu Governu iha dever morál hodi tau netik fatin espesiál ba sira atu sira bele garante funsionamentu ho profisionál no saudável iha sira nia “vokasaun kmanek ne’e”.

Internet gratuitu

Profesór sira sai nu’udar mata-dalan ba vida akadémika no aumezmu tempu mata-dalan mos ba “uma vida civilizada”. Artista Timor oan ida naran “Jovi Baptista” nia múzika ida hananu nune’e “La iha mestri la iha ema matenek, la iha mestri la iha dezenvolvimentu […]  aat liu tan bainhira ema boot balun tur iha kareta laran rona múzika ne’e hodi doko ulun maibé la muda buat ida. “QUE PENA???”

Se ita dehan katak husi profesór ne’e mk hamosu ema matenek oioin entaun ita koko hatama situasaun ida ne’e nu’udar problema ne’ebé presiza tebes atu hadi’a ka rezolve la’ós atu husik de’it ou hanesan termu ohin loron nian karik dehan “hatama tiha ba gaveta” sé mak bai-bain hatama sasan sira ne’e ba gaveta? se estudante ka profesór ida mak la hatene atu hatan ba ida ne’e mos demais.

Ohin loron ita tama ona iha mundu dijitalizadu no hakarak eh lae ita hotu tenke aseita tanba ida ne’e realidade. Nune’e mudansa ida ne’ebé drástika demaziada halo siénsia sira sempre avansa ba oin, mosu mai ho teoria oi-oin. Ha’u fiar katak internet sei sai belun di’ak ida ba profesór sira se sira hadomi tebes sira nia vokasaun. Husi internet ne’e mestri bele “Up date” nafatin siénsia ba alunu sira ho nune’e “Manual do professor e do Aluno” tenke sai fonte primária maibé la’ós “fonte única”.

Atu garante ida ne’e governu tenke kria kondisaun ho “internet gratuita ba profesór sira” duke fó saldo gratuita ba “DG” maibé sira nia oan mak uza fali hodi tama mídia sosiál no ha’u hanoin katak “pedagogia do Covid-19” hanorin ita oinsá tama iha mundu dijitalizadu hodi halakon tiha hanoin uluk nian sira ne’ebé sempre dehan “Mídia Sosiál” ne’e nakonu ho buat aat. Nune’e presiza tebes atu fó tan espasu ba profesór sira atu bele halo auto-didátiku ba koñesimentu foun.

Nesesidade uma laran

Hanesan iha leten ha’u hateten ona katak maske profesór ne’e hanesan vokasionadu ida maibé keta haluhan katak nia mai husi família ida no barak mak harii ona uma kain. Bele joven ida ba mos iha nesesidade pesoál no familiar kuantu mais kaben-na’in ida konserteza ke nia nesesidade ne’e sa’e liu tan, “ezijente no balun urjente” tebes.

Iha ita nia “Plano Estratégico do Desenvolvimento Nacional 2011-2030” ne’e dehan sei garante edukasaun ida kualidade, profisionál, inkluziva ema hotu atu asesu hodi forma ema ne’ebé sivilizadu. Agora ita tama ona ba tinan 2021 katak hela sei 9 de’it ona maibé buat sira ne’ebé ha’u sita iha leten ne’e sai de’it “assunto da conversa”, ho ida ne’e mak ha’u dehan “tebes iha tinan 2030 ne’e ita bele atinje objetivu ida ne’e?” ha’u hanoin katak lae tanba ita seidauk haree mudansa ida ne’ebé signifikante tebes iha edukasaun Timor nian.

Ha’u la nega katak edukasaun la la’o maibé presiza duni atu hadi’a buat balun. Aat liu tan sai iha notísia katak ukun na’in sira atu sobu fali “Plano estratégico do Desenvolvimento Nacional 2011-2030” to’o iha ne’e mak ha’u foin hatene no komprende dia-di’ak saida mak “politik bongkar-pasang”. Dala ida tan edukasaun la’ós instrumentu hodi halo polítika partidária maske presiza polítika edukasionál ida ne’ebé hateke ba mundu nia dezenvolvimentu.

Bele muda buat oin-oin maibé la iha serteza ba deskrisaun sira ne’ebé sitadu iha leten ne’e ha’u hanoin katak hanesan hela ema dehan “1+1=1” ka iha hanoin seluk ne’ebé ema dehan “taka rai ku’ak tuan hodi ke’e rai ku’ak foun” ne’e katak hanesan de’it so diferente mak “rai ku’ak tuan+ rai ku’ak foun= nafatin rai ku’ak”. Nune’e ha’u hanoin katak presiza tebes atu governu hanoin oinsá rezolve “nesesidade boot liu fali saláriu ne’ebé profesór sira hetan kada fulan”.

Saláriu la sufisiente “Governu presiza investe maka’as liu tan”

Ohin ema hateke ba profissão “professor” ne’e hanesan fali “última via para o trabalho” a final profesór ne’e “determinador da formação integral dum estudante ou seja dum cidadão”. Ha’u hanoin katak ida ne’e akontese tanba iha ema nia kakutak ne’e profesór hanesan knaar todan no nia saláriu ki’ik demais. Balun sei argumenta katak ita nia sitema edukasaun (student is the centre of learning) katak alunu sira mak sai sentru ba aprendizajen ka alunu sira mak sai protagonista ba prosesu aprendizajem tuir John Dewey.  Maibé oinsá mak alunu ida bele hatene dia-di’ak sasan sira se iha giador ida ne’ebé proekupa ho eskola au mezmu tempu preokupa ho nesesidade familiar ne’ebé la koresponde ba saláriu mensál?

Ha’u hakarak haloos kedas afirmasaun ne’e katak loos duni sai edukadór ne’e la’ós atu sai riku maibé pelu menus hatan netik ba ema nia nesesidade familiar. Iha boot balu sei argumenta katak to’o agora profesór ida seidauk mate tan hamlaha. Ha’u hanoin katak la’ós kestaun mate ou lae maibé Governu tenke muda sistema hodi rezolve profesór sira nia nesesidade atu sira bele focus de’it iha knaar ida profesór sem fahe ba seluk no la bele prejudika “kualidade do ensino”. Hanesan Artista Timor oan Jovi nia afirmasaun karik dehan mestri ne’e “eduka ema  xave ba futuru, maske o nia saláriu la sufisiente […]”.

Husi asuntu sira ne’e mak sai hela problema atual ba ita nia Estadu ida ne’e maske hotu-hotu hakilar dehan “jovem mak futuru nasaun ida ne’e nian” seluk fali hato’o sira nia diskursu ne’ebé nakonu ho retórika “Educkasaun mak xave ba dezenvolvimentu”. Buat hirak ne’e sei sai de’it retórika kuandu laiha asaun konkreta tanba “mehi ne’e sei sai mehi de’it bainhira la konkretiza mehi iha realidade”.

Konforme (DECRETO-LEI N° 23/2010) iha preámbulu husi dekretu ne’e hateten kedas objetivu husi IV governu iha momentu ne’ebá katak “O desenvolvimento de um sistema de educação e ensino de kualidade, promotor dos valores essenciais da formação humana e científica dos futuros cidadãos de Timor-Leste” maibé realidade povu mak sei tetu no ha’u fiar katak povu mos sei la nega buat ida husi realidade.

Iha dekretu ne’e nia rohan aneksa mos ho saláriu profesór nian. Ita bele haree katak profesór sira nia saláriu ne’ebé boot liu (eskalaun 6) ne’e mak hetan $600 no mínimu assistente sira ne’e hetan $264. Imajina hanesan ne’e oinsá mak profesór ne’e hatan ba nia nesesidade familiar. Osan ba família de’it la to’o ona oinsá mak profesór bele lori osan ne’e balun sosa livru sira ne’ebé nia presiza atu lee?

Osan povu nian barak fakar de’it ba pensaun vitalísia “servisu de’it períodu balun” maibé simu osan liu fali ema ne’ebé sai promotor ba dezenvolvimentu umanu. Sira haluhan tiha katak molok sira to’o iha Parlamentu Nasionál sira nia abut ne’e profesór sira mak rega se la ho profesór sira nia liman badaen maka ha’u hanoin katak sira mos la hatene tan saida mak Parlamentu.

Prezidente Parlamentu Nasionál Dr. Aniceto Guterres dehan “lei hotu-hotu ne’e tenke prioridade, […..] tuir prioridade Estadu nian” (TVTL,21,jun,2021) katak agora dau-daun “LPV” la’ós prioridade Estadu nian maibé bainhira mak prioritiza ne’e? “NA’I ULUN” sira mak hatene. Agora ne’e lei pensaun vitalísia komesa “la’ós prioridade Estadu nian fali ona” no ami hein katak to’o iha kampaña mos “LPV” nafatin la’ós prioridade iha promesa sira. Ha’u gosta tebes Filózofu “tanpa gelar” Rocky Gerung ema Indonézia nian hateten “hanya pemerintah yang mampu berbohong secara sempurna” (TVoneNews, ILC, 18-jan-2017) Rocky ko’alia ba governante Indonézia nian ne’ebé ha’u fiar katak ita nia boot sira iha Timor sei la akontese nune’e.

Tinan-tinan governu bele hasai osan tokon ba tokon maibé la hadi’a investimentu ba saláriu profesór sira nian, ha’u hanoin katak defísil atu ita halo “passo qualitativo no ámbito educacional a nível nacional quanto internacional”. Se Governu hadi’a saláriu mak ema barak liu-liu hirak ne’ebé formadu ona iha área edukasaun sei iha interese atu sai profesór.

Ministériu tenke hadi’a mos “sistema do recrutamento aos professores” hodi haree (nível acadêmico, Competência no profissionalismo do trabalhoexperiência do trabalho”) maske dekretu sitadu iha leten ne’e mos prevé konaba rekrutamentu até ke formasaun kontínua profesór sira nian maibé presiza mos halo teste ba profesór sira nia kompeténsia periodikamente.  Se ida ne’e mak Governu prenxe ona, koko tan hodi hadi’a “sistema do controlo ao professor” sira ne’ebé hanorin no ha’u fiar katak Edukasaun Timor sei marka istória ho “pasu kualitativu ida ne’ebé significante”.

Husi ne’e ita reza atu boot sira la bele mehi de’it maibé tenke konkretiza mehi ne’e ho nia métodu sira ne’ebé konfortável no adekuadu ho situasaun no karaterístika povu Timor nian keta lori teoria sira ema rai avansada mai aplika toma-tomak de’it iha Nasaun foun hanesan Timor-Leste. Presiza estudu di’ak ida entre péritu Timor oan sira atu hatur ita nia sistema ne’e hodi fó kor ida nebé reprezenta duni identidade Timor nian.

Ikus liu atu remata, permite atan ha’u atu hateten katak “profesór ne’e istrumentu konkretu husi konseitu hotu-hotu ne’ebé propoin ba edukasaun” maibé Governu investe ba setór ida ne’e hanesan fali “setór sekundáriu” ne’e difisil atu ita bele realiza “passo qualitativo” ba edukasaun. Hanesan estudante nune’e mos hanesan sidadaun hakarak hato’o ba governate sira partikularmente “Ministériu Edukasaun Juventude no Desportu no Ministériu Ensinu Superior” atu hadi’a saláriu profesór sira nian no kondisaun sira ne’ebé ha’u hatur iha leten. Nune’e atu la bele prejudika profesór kuantu alunu sira nia aproveitamentu estudu nune’e fó naroman ba públiku konaba “serviço e trabalho”, internet gratuitu ba profesór sira hodi “up date” nafatin sira nia koñesimentu ba alunu sira.

Hakerek nain nu’udar estudante Fakuldade Filosofia no Institutu Superiór Filosofia no Teolojia. Dom Jaime Garcia Foulart, Fatumeta.

HAKEREK NO HATÁN

Please enter your comment!
Please enter your name here