Komunidade nia atividade iha Merkadu tradisionál Darabai, Uatulari, Viqueque. Imajen Tatoli/Vitorino Lopes da Costa

VIQUEQUE, 26 juñu 2021 (TATOLI)-Dezde maiu to’o juñu ne’e, Sentru Saúde Postu Administrativu Uatulari, Munisípiu Viqueque, rejista pasiente moras Infesaun Respiratoriu Aguda (IRA) hamutuk 400-resin.

“Moras ne’ebé ami rejista iha fulan maiu to’o juñu ne’e, barak liu IRA ho númeru 400-resin. Ami mos rejista moras seluk, maibé nia persentajen ki’ik kompara ho moras IRA,” xefe sentru saúde postu administrativu Uatulari, Valente Soares da Silva,  informa ba Agência Tatoli iha Uatulari, sesta (25/06).

Valente hatutan, moras IRA rejista númeru boot  implika hosi mudansa klimátika, rai-manas, rai-rahun no seluk tan.

Sentru saúde Uatulari iha pesoál saúde hamutuk na’in-12 kompostu hosi mane na’in-ualu (8) no feto na’in-haat (4).

Moras IRA  mak infesaun viral (infesaun ne’ebé kauza husi virus) ne’ebé akontese iha ema nia dalan iis. Bainhira dada iis oksijéniu/anin sei halai tuir nia dalan iis antes to’o iha pulmaun.

Teoria medisina nian ne’ebé publika iha pájina ofisial Facebook Conhese no prevene, Medicina 16 katak moras IRA ne’e normálmente forma hosi Inus, cavidade nasal(inus kuak), faringe no laringe (kanal rua ne’ebé nia lokalizasaun iha kakorok).

Anin/oksijéniu sei pasa hosi dalan-isin hirak ne’e molok tama ba traqueia no pulmaun. Infesaun ne’ebé akontese iha dalan-iis sei provoka/halo ema sente susar no la konfortavel bainhira dada iis, no nu’udar konsekuénsia sei halo isin falta oksijéniu hodi hal’ao nia funsaun ho di’ak.

Moras IRA kauza hosi virus no baktéria ne’ebé invade diretamente ema nia dalan iis liuhosi matan, inus no ibun. Virus sira ne’ebé hamosu moras ne’e mak hanesan rhinovirus, coronavirus, virus parainfluenza, no adenovirus.

Fatór sira maka kontribui atu moras IRA relasaun ho indivíduu :

– Labarik sira ne’ebé la simu imunizasaun

– Bebé ne’ebé la hetan susu hosi inan

– Bebé no labarik sira menór de 1 ano(<1 ano)

– Sistema imunolojia fraku(daya tahan tubuh lemah)

– Má nutrisaun

– Moras krónika

– Ijiene pesoál ne’ebé ladi’ak

Relasiona ho ambiente

– Mudansa temperatura ambientál

– Poluisaun (rai-rahun)

– Asinamentu (kepadatan, overcrowding)

– Falta ventilasaun iha uma

– Fumadór barak (suar hosi sigarru bele hasae insidénsia ba moras ne’e)

– Ahi-suar

Moras IRA da’et ka transmite liuhosi kontaktu direta (ko’alia, finin, kaben) ho ema ne’ebé hetan tiha ona moras ne’e no sinal ho sintoma mak:

– Inus been/metin

– Mear (mear maran)

– Isin-kolen/baruk

– Isin-manas(dalaruma)

– Garganta moras

– Ulun-moras(dalaruma)

Oinsá kona-bá ninia tratamentu

Tratamentu ba iha IRA iha oin-rua (2) mak hanesan tratamentu medikamentu (ho ai-moruk), no tratamentu no-medikamentu (la uza ai-moruk)

– Tratamentu medicamentosa (ho ai-moruk): médiku-sira mak sei fó bainhira ba hala’o konsulta iha sentru saúde ka iha ospitál.

– Tratamentu no-medikamentu (tratamentu la ho ai-moruk) : Tratamentu ne’ebé prátiku no bele halo, hanesan suas ho bee-manas nia suar, hemu bee no jus barak, deskansa barak, no seluk-seluk tan.

Prevensaun

Moras IRA fasil tebes atu kona ema hotu, maibé fasil tebes mós atu prevene, bainhira iha konsiénsia no kultura saudavel. Asaun ka hahalok sira ne’ebé  halo hodi prevene moras ne’e mak hanesan :

  • Fase liman ho sabaun
  • Hadook aan husi ahi-suar no rai-rahun
  • Taka inus no ibun bainhira finin ka mear
  • Susu ben eskluzivu ba bebe foin moris to’o fulan neen (6)
  • La bele fuma besik sigaru
  • Halo vasinasaun
  • Kuidadu ijiene pesoál

Jornalista : Vitorino Lopes da Costa

Editór      : Francisco Simões

HAKEREK NO HATÁN

Please enter your comment!
Please enter your name here