Diretór Ezekutivu TIC Timor, I.P, Roberto Caitano de Sousa Vicente. Imajen TATOLI/Francisco Sony

DILI, 25 juñu 2021 (TATOLI)–Agência Tecnologia de Informação e Comunicação Timor, Institutu Públiku (TIC Timor, I.P) konklui ona konesaun rede lokál bá munisípiu 12 hodi garante no promove Governu eletróniku no integradu, interoperabilidade, asesível, simples no redús burokrasia.

“TIC Timor konklui ona koneksaun rede lokál ba munisípiu 12, ne’ebé Governu mak sai na’in no sai infrastrutura xave iha futuru bainhira projetu kabu submárina ramata, distribuisaun konetividade internet ba territóriu tomak bele extende hosi fasilidade rede lokál ida ne’e,” Diretór Ezekutivu TIC Timor, I.P, Roberto Caitano de Sousa Vicente, informa ba Agência TATOLI, iha ninia knaar fatin, Palásiu Governu, sesta ne’e.

Rede lokál ne’e fasilita asesu informasaun entre munisípiu ida bá munisípiu seluk, ba sistema Free Balance, Dalan ba Futuru, asesu dadus sira ne’ebé sentraliza iha sentru dadus Governu eletróniku iha Palásiu Governu, inklui utiliza aplikasaun vídeo konférensia ne’ebé adapta tuir plataforma sistema nakloke (open source).

Dadaun ne’e, munisípiu 12 asesu ona sistema jestaun finanseira hanesan Free Balance no Dalan ba Futuru, liuhosi liña Fibra Ótika Terrestre liuhosi intranet.

Iha futuru, aplikasaun Governu sei dezenvolve no asegura iha sentru dadus Governu eletróniku no disponível ba territóriu tomak atu asesu lokalmente sein iha nesesidade ba internet.

“Website instituisaun barak ona mak hosting ka asegura iha sentru dadus Governu eletróniku, munisipiu 12 bele asesu hotu website sira ne’e sein internet,” nia akresenta.

Tinan 2022 hahú dezenvolve plataforma ba atendimentu públiku

Hahú tinan 2022, TIC Timor  konsentra atu servisu hamutuk ho ministériu xave sira hodi dezenvolve plataforma servisu eletróniku sira ba atendimentu públiku, nune’e servisu hirak ne’e bele la’o lalais liu.

 Sistema sira ne’e, ajénsia teknolojia ne’e oferese sein ligasaun internet tanba iha rede lokál, ho objetivu  redús kustu no tempu, hasai produtividade, efisiénsia no efikásia.

“Ami iha ona pontu fokál iha munisípiu 12 hodi fó apoiu ba servisu tékniku informátika iha nível postu administrativu,” nia informa..

Nune’e mós, TIC Timor konklui Sistema Númeru Autonómu (Autonomous System Number) ho indiresu protokolu internet rasik hosi Asia Pacific Network Information Centre (APNIC) no  Sentru Dadus Nasionál, hodi kria infrastrutura ba hosting website ka aplikasaun sira ne’ebé dezeñu atu fornese mós serbisu báziku hanesan rai dadus servisu nia, e-mail, domain hosting no seluk tan  atu mellora no akomoda demanda kliente sira.

Diretór Ezekutivu haktuir, TIC Timor dezenvolve mós portál prinsipál no úniku  bá munisípiu 12 hanaran ‘Dashboard Governu’,  ne’ebé hanesan portál rekursu umanu no portal Jobs ba Governu no seluk tan.

“Ami dezenvolve no fornese ona website no e-mail ofisiál ba liña ministeriál sira no halo mós manutensaun no suporte téknika iha área Informasaun no Komunikasaun.

Ajénsia ne’e mós kontinua halo ona kooperasaun ho instituisaun Estadu sira hodi sentraliza sira-nia dadus mai sentru dadus TIC TIMOR I.P..

Aliende ne’e, tulun Governu hodi atualiza sidadaun ho informasaun sira ne’ebé loloos kona-ba COVID-19 iha Timor-Leste ho kriasaun website covid19.gov.tl, ne’ebé hanesan dalan atu kombate kombate hoax.

TIC Timor harii bazeia ba Dekretu-Lei númeru 29/2017, ho objetivu prinsipál atu ezekuta polítika sira ne’ebé hatuur iha Polítika Nasionál kona-ba Teknolojia Informasaun no Komunikasaun liuhosi Rezolusaun Governu númeru 8/2017.

Objetivu prinsipál estabelese ajénsia ne’e atu implementa polítika nesesáriu sira iha área teknolojia informátika, prepara no aprova estratejia ICT, prepara no implementa teknonoljia nesesáriu sira, toma konta aplikasaun no infrastrutura rede Governu eletrónika inklui kabu fibra ótika bazeia ba prioridade nasionál.

Atu implementa inisiativa Governu eletróniku ne’ebe prevee iha ajenda Reforma Administrasaun, VIII Governu Konstitusionál atu hatur administrasaun públika ida-ne’ebe efetivu liu, transparente, hadi’a prestasaun servisu no hamenus burokrasia.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here