Atividade Merkadu Maliana, Bobonaro, sábadu (26/06/2021). Imajen Tatoli/Sérgio da Cruz

BOBONARO, 26 juñu 2021 (TATOLI)-Negosiante merkadu Maliana, Munisípiu Bobonaro, sente di’ak uitoan ona hafoin Governu hakotu serka sanitária iha Bobonaro.

Negosiante Santina Maia, hateten bainhira Governu hakotu serka sanitária   iha Bobonaro, atividade no movimentu iha Maliana laran komesa rekupera fila-fali. Ho nune’e, atividade ekonómiku mós la’o neineik ona.

“Ami kontente tanba horiseik to’o ohin, ema barak mak mai halo kompras ona iha merkadu. Durante serka sanitária atu hetan de’it $1.00 mós difisil tebetebes, mas iha merkadu kinta liubá ha’u hetan rendimentu $17.00,” Santina Maia hateten bainhira dada-lia ho Agência Tatoli iha merkadu Maliana, sábadu ne’e.

Nia dehan, agora mós agrikultór-sira hosi Lolotoe, Cailaco, Atabae no Balibo, ba fa’an fali ona iha merkadu Maliana, ho nune’e, komesa hatudu movimentu ekonómiku iha munisípiu laran.

Motorista transporte públiku, Domingos Araújo, mós espresa ninia sentimentu ksolok  tanba nia hahú kondús fali ona karreta hodi buka osan sustenta nesesidade uma-laran.

Observasaun Agência Tatoli nota katak transporte públiku hanesan, anguna, truk no ojek halo fali ona atividade, enkuantu mikrolete mak sidauk tanba ensinu aprendizajen seidauk re-ativa.

Tuir dadus evolusaun surtu Covid-19 iha munisípiu Bobonaro, 25 juñu  ne’e, hatudu Bobonaro deteta kazu pozitivu foun iha oras 24 na’in-rua, rekuperadu na’in-ida, kazu ativu 38, kumulativu rekuperadu 195, kumulativu konfirmadu 236, óbitu iha oras 24 laiha (-) no kumulativu óbitu tolu (3).

Jornalista       : Sérgio da Cruz

Editór             : Francisco Simões

HAKEREK NO HATÁN

Please enter your comment!
Please enter your name here