Vasina AstraZeneca. Imajen TATOLI/António Gonçalves

BAUCAU, 25 juñu 2021 (TATOLI)–Xefe suku Buruma, postu admistrativu Baucau villa, munisípiu Baucau, Libório dos Santos Freitas, lamenta tanba stock vasina limitadu ba komunidade iha suku Buruma.

“Ami ladún kontente tamba hosi parte saúde informa mai ami atu mobiliza komunidade sira mai partisipa iha vasinasaun, maibé ikus mai sira distribui la sufisiente,” Xefe suku hateten iha sede suku Buruma, sesta ne’e.

Notísia relevante: Stock vasina AstraZeneca iha Baucau limitadu

Kampaña Vasinasaun hala’o iha suku Buruma durante loron rua, loron 24 to’o 25 juñu, ne’ebé iha loron dahuluk komunidade hamutuk 139 mak partisipa vasina no loron daruak sei vasina ema 120, bazeia ba stock vasina.

Suku Buruma hamutuk aldeia haat hanesan Tasi, Casmuto, Ono-sere no Soli-ua.

Aldeia Tasi mak rejista iha Sentru Saúde Diwake, enkuantu aldeia Casmuto, Ono-sere no Soli-ua rejista iha Sentru Saúde Buruma, ne’ebé daudaun ne’e tuir vasinasaun iha sede suku.

“Foin mak 259 de’it, dadus ne’ebé ita iha hamutuk 1.692,” nia akresenta.

Iha fatin hanesan, Responsável Imunizasaun munisípiu Baucau, Artemísia Guterres, rekuñese komunidade Buruma entusiazmu partisipa kampaña vasinasaun, maibé vasina limitadu no labele kobre tuir númeru ne’ebé rejista ona iha suku Buruma.

“Ita-nia populasaun barak mak entusiazmu hakarak simu vasina, maibé stock vasina agora daudaun laiha ona,” nia hatutan.

Tuir dadus, ema hamutuk 1.692 mak sei hetan vasina iha suku Buruma, kompostu hosi idade 18 ba leten hamutuk 1.479 inklui idozu no invalidez hamutuk 213.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here