Servisu interkoneksaun. Imajen/Espesiál

DILI, 25 juñu 2021 (TATOLI)—Diretór Ezekutivu Agência Tecnologia de Informação e Comunicação Timor, Institutu Públiku (TIC Timor, I.P), Roberto Caitano de Sousa Vicente, hateten, atu asegura dadus Governu, maka hahú sentraliza dadus liuhosi estabelese sistema TIC iha insitituisaun Estadu.

“Instituisaun Estadu hamutuk 40 resin maka koopera ho TIC TIMOR no uza fasilidade ne’ebé ami fornese. Hein iha futuru liña ministériu hotu inklui instituisaun Estadu sira bele liga direta hodi sentraliza dadus mai sentru dadus TIC TIMOR hodi asegura no rai dadus Governu ho seguru,” Diretór Ezekutivu ne’e informa ba Agência TATOLI, iha ninia knaar fatin, Palásiu Governu, sesta ne’e.

TIC-Timor nia estratejia hakarak sentraliza rekursu informátika no garante memória institusionál iha longu prazu, asegura informasaun sensitivu sidadaun, proteje dadus no privasidade no hasa’e konfiansa sidadaun atu uza plataforma online hodi halo transasaun.

“Ita-nia ministériu balun seidauk fó importansia kona-ba ezisténsia TIC TIMOR nia, nune’e sidauk konekta direta mai ami no sentraliza dadus Governu mai sentru dadus,” nia subliña.

Tuir Diretór Ezekutivu, investimentu Governu eletróniku presiza investimentu boot, liuliu iha rekursu umanu no infraestrutura hodi hasa’e kapasidade teknolojia no kuñesimentu tékniku hodi fornese plataforma atendimentu ne’ebé sentralizadu no 100% online.

Atu mellora polítika Governu eletróniku, ajénsia ne’e foku iha komponente haat  hanesan jestaun ba programa, teknolojia, prosesu no estratejia.

Nune’e, TIC TIMOR mai ho konseitu Framework Governu eletróniku ho dimensaun hitu, ne’ebé nu’udar baze ida hodi kria programa ba tinan-lima to’o 20, ho planu atividade annuál hanesan rekursu umanu, programa Governu eletróniku, estratejia Governu eletróniku, arkitetura TIC, infraestrutura Governu eletróniku, prosesu negósiu no sistema informasaun inklui asesu uzuáriu, ne’ebé internet  no intranet depende ba pré kondisaun.

Kona-ba dezafiu, funsionáriu tékniku seidauk to’o 100%, enuantu iha planu annuál TIC hanaran Training of Trainers presiza tebes hodi atinje númeru formadór sira hodi responde ba nesesidade tékniku.

Alende ne’e, Diretór Ezekutivu TIC Timor konsidera instituisaun Estadu balun sei kontinua depende ba rekursu estranjeiru hodi aumenta gastu tinan-tinan, maski TIC ninia papél atu redús kustu iha área informátika no komunikasaun ba instituisaun Estadu sira hotu.

Daudaun ne’e, TIC TIMOR serbisu hamutuk ho Ministériu Justisa no ministériu sira seluk ne’ebé hola parte iha Komisaun Téknika Eventuál Identidade Únika, hodi prepara Lei Privasidade no Protesaun Dadus hodi asegura liután seguransa no privasidade dadus sidadaun ne’ebé Governu rekolla.

Nune’e mós, prodús ona ezbosu lei ligadu ba komérsiu eletróniku, propriedade intekletuál (copyright) ka direitu autorál, revee polítika nasionál ICT no prodús estratejia sibernétika.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here