Estudante UNTL forma hela hodi simu Vasina Sinovac iha kampus Caicoli, segunda (14/06/21). Imajen Tatoli/António Gonçalves.

DILI, 25 juñu 2021 (TATOLI)—Dadus hosi Komisaun Interminsiteriál ba implementasaun vasina  COVID-19 iha Timor-Leste  (TL), hatudu katak, to’o 23 juñu 2021, populasaun iha munisípiu Dili ho 50% mak simu ona vasina doze dahuluk.

Pursentu 50 ne’e mai hosi totál populasaun sensus uma-ka’in 2015, hosi munisípiu Dili nian, hamutuk 352.553.

Notísia relevante:OMS-MS kontinua konsidera AstraZeneca nu’udár vasina efetivu liu

Enkuantu, dadus kona-bá munisípiu hotu, totál populasaun ne’ebé simu ona vasina doze dahuluk ho persentajen 12%.

“Populasaun iha munisípiu Dili ne’ebé simu ona vasina doze dahuluk to’o 23 juñu hamutuk 107.609 (50%) no munisípiu hotu hamutuk 65.028 (12%),’’ Portavoz  Komisaun Interminsiteriál ba Implementasaun Vasina  COVID-19, Danina Coelho hateten ba jornalista-sira iha salaun MSSI, Caicoli, sesta ne’e.

Hosi númeru ne’ebé simu ona doze dahuluk, populasaun iha munisípiu Dili ne’ebé simu ona doze daruak hamutuk 13.815 (7%) no iha munisípiu hotu hamutuk 11.268 (2%).

Maski nune’e, Komisaun Interministeriál nota katak, ema ho idade 60 ba leten barak mak seidauk simu  vasina  no pesoál saúde kontinua enkoraza atu simu  hodi proteje sira-nia an hosi  COVID-19.

Munisípiu sira ne’ebé mak hahú  halo vasinasaun doze dahuluk no daruak, ninia kobertura boot mak iha munisípiu Baucau ema hamutuk 8.736, Bobonaru 8.700,  Viqueque  8.276,  Ermera 7.482, Covalima7.464, Lautem 7.183 no Aileu 3.638.

Entretantu, totál populasaun iha Timor-Leste bazeia ba dadus sensus uma-ka’in iha tinan 2015 hamutuk 1.183.643.

Danina Coelho mós informa katak, vasina AstraZeneca hosi Austrália ne’ebé durante ne’e uza hodi halo vasina  iha munisípiu Dili hotu ona no oras ne’e daudaun kontinua ho Sinovac.

To’o ohin, Sala Situasaun, Sentru Integradu Jestaun Krize (SIJK), rejista kazu pozitivu COVID-19 hamutuk 23, rekoperadu 55 no kazu ativu 868.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here