Fatin Maternidade iha Sentru Saúde Manufahi. Imajen Tatoli/Nelia Fernandes

BOBONARO, 25 juñu 2021 (TATOLI)—Ministériu Saúde (MS) rekoñese katak, infraestrutura fasilidade saúde iha territóriu tomak, liuliu iha munisípiu Bobonaro agora kondisaun la di’ak hodi halo atendimentu ba pasiente.

Vise-Ministru Saúde, Bonifácio Maucoli dos Reis hato’o rekoñesimentu ne’e tanba tuir nia haree katak, edifísiu barak maka konstrui iha tempu Indonézia no balun iha tempu UNTAET.

Notísia relevante:MS enkoraza pesoál saúde Bobonaro kombate TBC, malária no HIV

Ho situasaun ne’e maka, Governu iha ona planu atu halo konstrusaun ba sentru saúde foun ne’ebé tuir rekizitu saúde sei kompleta mós ho fasilidade ne’ebé sufisiente, nune’e bele halo atendimentu ho dignu.

“Ita hatene katak, konstrusaun barak mak desde UNTAET nia tempu to’o agora. Iha balun mak tuir duni kritériu, maibé balun la tuir,” Membru Governu ne’e ko’alia iha salaun administrasaun Bobonaro, sesta ne’e.

Alende harii insfraestrutura, Governu mós sei halo rekrutamentu ba pesoál saúde-sira atu koloka ba sentru saúde ne’ebé iha área rurál, inklui ekipamentu médiku no hadi’a bee moos, eletrisidade, inklui konstrui rezidénsia ba pesoál saúde-sira, nune’e labele abandona serbisu.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here