Vasina Sinovac, Imajen Tatoli/António Gonçalves.

DILI, 25 juñu 2021 (TATOLI)—Ministériu Saúde (MS), liuhosi Diresaun Nasionál Saúde na Família (DNSnF), presija rekursu umanu atu fó apoiu ba sistema Rejistu Saúde Eletrónika Timor-Leste (RSETL), hodi kolleta informasaun kona-bá vasina.

“Rejistu Saúde Eletrónika Timor-Leste hanesan ita-nia riku-soin ne’ebé timoroan rasik mak jere. Agora, problema dilemátiku ba ami mak sei menus rekursu umanu no ekipamentu,’’ Diretór SnF, Vitór Soares Martins, hateten ba jornalista Agência Tatoli, sesta ne’e.

Notísia relevante:MS lansa Mobile Application ba rejistu saúde eletrónika

Tuir dadus hosi DNSnF oras-ne’e daudaun, funsionáriu ne’ebé hala’o serbisu ba operasaun sistema RSTL hodi kobre territóriu tomak hamutuk 168.

Hosi númeru ne’e, iha na’in-ne’en mak fó apoiu iha sentru vasinasaun Centro Convenções Dili (CCD) no na’in 20 fó apoiu iha serbisu saúde munisípiu Dili no restu iha sentru saúde-sira iha territóriu tomak, ho kada sentru saúde iha pesoál na’in-rua.

Ho problema ne’ebé maka iha, ohin, DNSnF simu ona funsionáriu kontratadu rejime internatu hosi Diresaun Nasionál Rekursu Umanu hamutuk na’in 54  atu bele reforsa sentru de dadus  liu-liu postu vasina-sira iha munisípiu Dili.

Ohin mós DNSnF ho Institutu Nasionál Saúde (INS) fó orientasaun ba vasinadór hamutuk 90 kompsotu hosi parteira no enfermeiru ne’ebé koloka iha sentru saúde lima iha Dili, inklui sentru saúde postu administrativu Ataúro.

Entretantu, Ministra Saúde (MS), Odete Maria Freitas Belo, lansa Mobile Application ba Rejistu Saúde Eletrónika Timor-Leste (RSETL), iha salaun MS Palásiu sinzas, Caicoli, sesta 30 abríl 2021.

Aplikasaun ba telemóvel ne’e uza hodi ajuda kolleta informasaun kona-bá vasinasaun COVID-19, liuliu atu rekolla ema na’in hira mak vasina ona, se mak seidauk vasina, balansu hosi vasina ne’e hela hira, simu vasina ba dala hira ona, ba doze primeiru ka doze segundu.

Aplikasaun ne’e oferese hosi David Montalvão nu’udár Timor-oan ne’ebé estabelese sistema SnF, no bainhira iha vasinasaun COVID-19, ajuda mós MS hodi oferese gratuitamente.

Relatóriu kona-bá situasaun epidemiolójika periúdu semana ida, hahú hosi 14 to’o 20 juñu 2021, relasiona ho vasinasaun kontra COVID-19, to’o 19 juñu, populasaun Timor-Leste hamutuk 125.962 simu ona vasina doze dahuluk, ho persentajen 16,7% hosi populasaun TL ne’ebé ho idade 18 ba leten.

Jornalista: Felicidade Ximenes

Editór: Cipriano Colo

1 KOMENTÁRIU

  1. Hau simu ona Vasinasaun etapa sigundu no halo registrasaun ba via online iha 25/6/2021. maibe to agora Seidauk hetan konfirmasaun ( iha Sistema dehan hein to loron 3 mak hetan konfirmasaun maibe to agora Seidauk simu verifikasaun.
    Ita hein to bainhira mak bele rona nia resultadu.

HAKEREK NO HATÁN

Please enter your comment!
Please enter your name here