Inspesaun estrada dirasaun Baucau-Viqueque, tersa (01/06). Imajen/MOP

DILI, 25 juñu 2021 (TATOLI)Ministru Obra Públiku, Salvador Eugênio Soares dos Reis Pires, husu ba kompañia Internasionál CBMI Construction Co, LTD  ho konsórsiu Chonqing Road Engineering Group CO, LTD, kontinua garante kualidade konstrusaun estrada nasionál munisípiu Baucau bá Lautém.

“Ha’u-nia fatin nakloke no suporta ita-boot sira hodi ko’alia ba kestaun relevante, bázikamente hodi fasilita povu Timor-Leste. Ha’u-nia parte sei halo buat hotu hodi suporta ita-boot nia servisu, no dala ida tan, favór garante kualidade di’ak. Kualidade projetu importante tebes,” Ministru hateten liuhosi nota ne’ebé TATOLI asesu, sesta ne’e.

Governante ne’e hato’o kestaun ne’e, hafoin halo inspesaun ne’ebé akompaña hosi Diretór Jerál Administrasaun no Finansa (DJAF), Januário Patrício Barbosa no Jestór Unidade Jestaun Manajementu (PMU, sigla inglés) estrada, Sidónio Amaral Freitas, hodi haree progresu konstrusaun estrada nasionál ne’ebé atinje ona 84%.

Iha ámbitu inspesaun no akompaña aprezentasaun hosi kontratór no konsultór kompañia, Ministru konsidera garante kualidade obra di’ak ne’e importante, nune’e bainhira projetu hotu, kompañia Internasionál sira bele rai hela kondisaun infraestrutura ho kualidade di’ak hodi fó benefísiu ba abitante sira ne’ebé asesu infraestrutura ne’e.

Iha biban ne’e, kompañia promete sei halo konstrusaun trosu estrada ne’e ho di’ak  no garante kualidade.

Notísia relevante: MOP klarifika progresu konstrusaun estrada dirasaun Baucau-Viqueque

Inspesaun ne’e hodi haree direta progresu konstrusaun, rona problema no preokupasaun ne’ebé kompañia kontratór no konsultór enfrenta iha terrenu, inklui haree mós kualidade konstrusaun estrada.

“Observa pontu importante sira iha konstrusaun estrada trosu Baucau-Lautém ne’ebé presiza halo realiñeamentu iha área protejidu, ponte ezistente sira, no prosesu indeminizasaun ba komunidade afetadu sira,” nia esplika.

Nune’e, Ministru husu ba PMU no kompañia atu servisu hamutuk, koordena no ko’alia ho abitante afetadu sira kona-ba prosesu indemnizasaun, nune’e bele fasilita konstrusaun trosu refere hodi labele atraza prosesu konstrusaun.

Situasaun atuál afeta progresu konstrusaun

Iha biban ne’e, kompañia hato’o preokupasaun kona-ba kauza hosi Estadu Emerjénsia, Serka Sanitária no Konfinamentu Obrigatóriu iha kapitál Dili, afeta progresu konstrusaun, liuliu prosesu mobilizasaun ekipamentu no traballadór hosi Dili bá munisípiu Baucau-Lautém hodi halo serbisu.

Notísia relevante: Governu mantein Serka Sanitária iha Baucau-Dili no hakotu Bobonaro-Covalima

Maibé, problema pandemia ne’e mundiál, nune’e kompañia sira kontinua kumpre regra Organizasaun Saúde Mundiál (OMS) no Ministériu Saúde (MS).

Daudaun ne’e, kompañia kontinua implementa teste temperatura kada loron ba traballadór estranjeiru no timor-oan ne’ebé hala’o serbisu iha trosu refere hodi evita propagasaun pandemia COVID-19.

Konstrusaun estrada nasionál ne’e iha parte balun hahú nahe ona aspalt no iha parte balun sei halo pengerasan ba base course, inklui sei hada moru protesaun sira.

Projetu ne’e, konstrui hosi kompañia Internasionál joint venture hosi kompañia CBMI Construction Co, LTD no Chonqing Road Engineering Group CO, LTD no hetan superviziona husi kompañia Internasionál Donsung Engineering CO, LTD, iha Joint Venture hamutuk ho Dongil Engineering CO, LTD, asosia hamutuk ho kompañia nasionál Kai Watu Kmanek Consultant Unip.Lda.

Projetu hahú iha loron 05 setembru 2017 no tuir planu ramata iha loron 21 fevereiru 2020, maibé seidauk konsege atinje tanba ho situasaun polítika no pandemia ne’ebé atraza prosesu.

Konstrusaun estrada nasionál ne’e hetan finansiamentu hosi  fundu impréstimu Banku Dezenvolvimentu Aziátiku (ADB, sigla portugés) ho montante $29.315.346,10 ho distánsia kilómetru 57,6.

Jornalista : Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here