Diretór Ezekutivu FONGTIL, Daniel Santos do Carmo. Imajen Tatoli/António Gonçalves

DILI, 25 juñu 2021 (TATOLI)-Forum Organizasaun Naun Governamentál Timor-Leste (FONGTIL) husu Ministériu Saúde (MS) liu-liu pesoál saúde ne’ebé hala’o servisu iha terrenu presiza presta atendimentu ne’ebé di’ak ba populasaun nune’e bele hasa’e taxa partisipasaun populasaun ba simu vasinasaun.

Notísia Relevante : GASC apoiu fundu $400.000 ba FONGTIL

Diretór Ezekutivu FONGTIL, Daniel  Santos do Carmo, lori FONGTIL nia naran husu ba Ministériu Saúde atu fó orientasaun nia pesoál saúde sira halo atendimentu di’ak ba komunidade nune’e bele motiva komunidade atu atinje polítika Governu nian to’o dezembru populasaun tenke vasina 80%.

FONGTIL destaka ona ninia membru na’in-44 halo monitorizasaun ba programa vasinasaun iha Postu 65, no munisípiu 12 inklui  Rejiaun Administrativa Espesiál Oé-Cusse Ambeno (RAEOA),  no hosi relatóriu sira ne’e hatudu katak iha munisípiu balu komunidade seidauk hetan informasaun kona-ba  vasina nian.

Liuhosi konferénsia imprensa iha sede FONGTIL, sesta ne’e, Daniel Santos do Carmo hateten, komunidade balu sei falta informasaun kona-ba vasina AstraZeneca no  iha mós iha Sentru Saúde Fatululik, Munisípiu Covalima, komunidade hotu hakarak simu vasina, maibé vasina maka laiha ka la to’o ba komunidade.

FONGTIL kestiona kapasidade Governu nian no FONGTIL konklui katak Ministériu Saúde dez-organizadu internu maneja distribuisaun vasina ba iha territóriu nasionál.

Iha Sentru Saúde Hatulia, Munisípiu Ermera, komunidade  simu tiha vasina AstraZeneca no kuaze na’in 20  la hetan kartaun orijinál vasina nian, maibé hetan fali kartaun fotokópia entaun komunidade kestiona kartaun vasina ne’e tenke  orijinál.

FONGTIL nia relatóriu hatudu mós situasaun hanesan ne’e akontese iha postu vasinasaun balun iha Dili, hanesan, Fatumeta, Sentru Saúde Comoro. Ida ne’e hatudu katak Ministériu Saúde laiha kapasidade atu organiza prodús kartaun vasina.

Tuir observasaun balu hosi FONGTIL katak vasina iha SAMES hotu ona, no ekipa hetan informasaun hosi SAMES katak hein aviaun tun mak halo  monitorizasaun, ida ne’e hatudu katak Ministériu Saúde ho SAMES mak la prepara fatin seguru ba rai vasina ka vasina mak laiha duni tanba Timor-Leste tanba dependénsia de’it ba apoiu hosi doasaun sira.

Durante FONGTIL nia monitorizasaun mós observa katak pesoál saúde iha Munisípiu Dili relata katak sira hala’o ona sira nia knaar durante fó vasina ba ema, maibé seidauk hetan sira-nia direitu, hanesan osan, tanba sira-nia estatutu hanesan kontratadu.

Iha monitorizasaun vasina nian iha Munisípiu Dili, FONGTIL observa sentru vasinasaun ne’ebé tau estabelese iha Universidade Nasionál Timor Lorosa’e (UNTL) dook hosi komunidade no Ministériu Saúde presiza halo jestaun ba transporte Ambulánsia nune’e bele fasilita pesoál saúde sira atu fó atendimentu vasina ba komunidade.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here