Monumentu Nicolau Lobato iha Aileu-Aissirimou. Imajen Tatoli/Evaristo Soares Martins.

AILEU, 25 juñu 2021 (TATOLI)—Aliserse monumentu Prezidente Nicolau Lobato ne’ebé lokaliza iha suku Assirimou, Postu Administrativu Aileu Vila, Munisípiu Aileu, hahú nakfera tanba impaktu hosi rai nakdoko. 

“Kona-ba aliser09:54:46se no asesór balun nakfera ne’e ita observa hela tanba administradór iha ona hanoin atu haree sasán ne’e ba futuru, tanba ita haree tinan hirak liubá hahú nakfera ona. Ha’u haree kestaun ne’e mós seidauk hatama iha planu asaun anuál. Ita-boot (jornalista) nia observasaun ba estátua ne’e fanu ami toma medida hodi halo diskusaun iha nível munisípiu nune’e haree sasán ne’e iha futuru,” Administradór Postu Administrativu Aileu Vila, Marcos dos Santos, informa ba Agência TATOLI, sesta ne’e.

Administradór Postu Aileu Vila ne’e informa ona ho Administradór munisípiu Abel da Conceição hodi hatama planu asaun anuál ba tinan tuir mai, nune’e bele halo reabilitasaun.

Tanba, dezde harii monumentu ne’e, konstrusaun hahú iha 2013 no inaugura iha 2014 ne’e, seidauk monta seguransa iha monumentu ne’e maibé parte munisípiu planea ona tanba parte postu administrativu fó ona paresér ba munisípiu katak presiza monta ka harii tán moru haleu monumentu ne’e.

Administradór Postu Administrativu Aileu Vila, Marcos dos Santos. Imajen Tatoli/Evaristo Soares Martins.

“Halo moru haleu atubele halo konservasaun di’akliu ba monumentu ne’e. Ne’e ha’u fó hanoin ona ba administradór munisípiu katak ba futuru ne’e tenke halo moru haleu tiha monumentu ne’e. Tanba, ita observa iha-ne’ebá ne’e katak fatin ne’e agora hanesan ema ba halimar fali. Xefe suku mós informa ba ha’u katak dalaruma kalan labarik sira lori malu ba iha-ne’ebá, tanba ne’e mak ita hanoin atu monta moru ka rede haleu tiha fatin ne’e,” nia akresenta.

Bainhira halo ona moru ka rede haleu monument ne’e, iha rai loron bele loke maibé iha kalan ne’e portaun tenke xave metin, nune’e ema labele uza fatin ne’e ba buat seluk.

“Ne’e ita hanoin ba futuru tanba ne’e fatin istóriku. Ha’u agradese ba ita-boot sira-nia observasaun nune’e ba futuru ami bele hatama iha planu,” nia dehan.

Administradór Postu Administrativu Aileu Vilva ne’e , haktuir prosesu konstrusaun ba estátua ne’e hahú iha 2013 no inaugura iha 2014. Daudaun ne’e, nia parte sempre fó orientasaun ba xefe suku Aissirimou no pesoál limpeza esgotu sira hala’o limpeza atubele halo konservasaun ba monumentu ne’e.

Monumentu ne’e inaugura iha loron kinta 27 novembru 2014 hosi Prezidente Repúblika Demokratika Timor-Leste (RDTL), Taur Matan Ruak, iha suku Aissirimou, Munisípiu Aileu.

Iha momentu ne’e, Prezidente Taur Matan Ruak ho eis Primeiru-Ministru atual Sekretáriu Jerál FRETILIN, Mari Alkatiri ko’a fita, hanesan sinál inaugurasaun. Hafoin ne’e, loke hena mutin ne’ebé taka metin estatua meiu corpo ne’e.

Fundasaun Monumentu Prezidente Nicolau Lobato nakfera. Imajen Tatoli/Evaristo Soares Martins.

Iha inaugurasaun ne’e, marka mós prezensa Primeiru-Ministru RDTL Kay Rala Xanana Gusmão, Vise-Primeiru-Ministru Fernando La Sama de Araújo, Prezidente FRETILIN atuál Prezidente Repúblika Francisco Guterres ‘LuOlo’, José Lobato (oan mane husi saudozu Nicolau Lobato), Rogerio Tiago Lobato (Alin hosi Nicolau Lobato), membru Governu, membru Parlamentu Nasionál, veteranu sira, Korpu Diplomatiku, konvidadu sira no komunidade Aileu kuaze rihun 5.

Alende inaugurasaun, halo mós seremónia rituál sulan Meik ho Kroat, ne’ebé partisipa mós lia na’in sira hosi munisípiu 13.

Iha tempu ne’ebá, Primeiru-Ministru Xanana Gusmão iha diskursu hateten, Governu rekoñese estátua Nicolau Lobato no fó onra ba sira hotu ne’ebé mate iha a prosesu luta ba ukun rasik-aan no ba sira-nia mehi atu ita kaer metin nafatin soberania no dignidade Estadu nian.

Tanba ne’e, Xanana husu Timor-oan hamutuk hanoin ida de’it, tane aas interese nasaun no povu.

“Ida-ne’e mak valorizasaun ba Nicolau Lobato nia sakrifísiu. Husu mós ba joven sira, atu Estuda hodi prepara-aan di’akliu tán ba futuru. Husu mós ba sosiedade tomak atu uza demokrasia hodi kurrije malu no fó atensaun ba malu,” Primeiru-Ministru hateten.

Reprezentante família saudozu Eis Prezidente Nicolau Lobato, Rogerio Lobato hato’o obrigadu ba Governu tanba halo tán Estátua ida ba saudozu Nicolau Lobato.

“Ami família boot hosi Leorema-Bazartete no Soibada-Manatuto, hato’o obrigadu ba Estadu Timor-Leste, tanba tau aas nafatin memória Saudozu Nicolau Lobato iha povu nia leet,” Rogerio hateten.

Iha momentu hanesan, Estadu Timor-Leste fó kondekorasaun ba timoroan na’in 32, tanba sira-nia koletividade subar lider maximu durante luta ba libertasaun nasionál nomós kondekorasaun ba veteranu na’in-137.

Entertantu Prezidente Komisaun Organizadór Jorge da Conceição Teme iha nia relatóriu informa, orsamentu ba konstrusaun estátua ne’e mai hosi fundu Ajénsia Dezenvolvimentu Nasionál (ADN).

Estátua ne’e sei sai nu’udar propriedade Estadu, hodi marka istória inssuriesaun armada iha loron 15 agostu 1975.

Tuir observasaun Agência TATOLI iha monumentu ne’e, nota katak fondasi hosi estátua ne’e hahú nakfera no ahi (eletrisidade) ne’ebé instala iha monumentu ne’e la funsiona.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here