Logo-tipu PDHJ

DILI, 25 juñu 2021 (TATOLI)—Relatóriu anuál Provedoria Direitu Umanu no Justisa (PDHJ sílga portugés), durante tinan 2020, rejista keixa hamutuk 246, kompostu hosi direitu umanu 152 no governasaun di’ak 94.

Hosi totál kesar hamutuk 246, loke Investigasaun 98, loke refere 30, mediasaun laiha, fiskalizasaun laiha, taka arkiva 18, taka haruka 81, anexa laiha, adia desizaun hamutuk ida no seidauk RAP 18.

Notísia relevante:PDHJ husu PNTL kumpre regra utilizasaun arma

Alende ne’e, halo investigasaun ba entidade públika hamutuk 15 ho númeru kazu hamutuk 98, hosi kazu direitu umanu 53 no governasaun di’ak 45.

“PDHJ halo investigasaun ba kazu 98 ne’ebé iha indísiu forte ba violasaun direitu umanu hamutuk 53 no violasaun governasaun di’ak 45,” Provedora, Jesuina Maria Ferreira Gomes, hateten iha relatóriu anuál  ne’ebé Agência Tatoli asesu, sesta ne’e.

Nune’e, realiza investigasaun no prodús relatóriu investigasaun finál (RIF) hamutuk 115, RIF ho rekomendasaun 22, RIF ho sujestaun sia no taka arkiva 84.

Iha meta estratéjiku ida ne’e, PDHJ relata medida hirak ne’ebé instituisaun ida-ne’e foti iha tinan 2020, hodi garante autoridade públika-sira realiza duni prevensaun no koresaun ba violasaun-sira, hasoru direitu umanu no governasaun di’ak.

PDHJ implementa mandatu konstitusionál, hodi simu keixa no apresia keixa hosi komunidade hasoru entidade públika liuhosi halo investigasaun no hato’o rekomendasaun ba entidade públika-sira, hodi restaura fali injutisa hirak ne’ebé komunidade hetan.

Komunidade ein jerál, aprezenta keixa hasoru entidade públika-sira ne’ebé iha indísiu ba violasaun direitu umanu no violasaun ba prinsípiu báziku governasaun di’ak.

PDHJ apresia keixa hirak-ne’e liuhosi foti desizaun hodi loke investigasaun, taka arkiva no envia ba entidade relevante atu fó solusaun ne’ebé nesesáriu.

Keixa balun PDHJ apresia liuhosi mediasaun no konsiliasaun. Rezultadu investigasaun sira konklui bainhira akontese ka la akontense violasaun direitu umanu no governasaun di’ak.

Bainhira akontese violasaun, PDHJ sei hato’o rekomendasaun ba entidade públika-sira hodi foti medida nesesária atu repara injustisa-sira ne’ebé akontese.

Regularmente PDHJ serbisu hamutuk ho entidade públika-sira, hodi garante katak, rekomendasaun hirak-ne’e hetan implementasaun.

“Objetivu finál maka PDHJ hakarak garante katak polítika no asaun Estadu nian kumpre ho konstituisaun no padraun internasionál direitu umanu, nomós governasaun di’ak,’’ relatóriu anuál ne’e haktuir.

Tuir estatistika kazu-sira ho natureza violasaun direitu umanu inklui kategoria violasaun ba direitu liberdade, integridade no seguransa.

Violasaun ba direitu onra no privasidade, no direitu ba liberdade integridade no seguransa akontese barak liu relasiona ho asaun ne’ebé foti hosi membru PNTL no F-FDTL ne’ebé durante halo atuasaun  iha terrenu liga ba implementasaun Estadu Emerjénsia.

Asaun ne’ebé halo hosi pesoál seguransa sira-ne’e mak hanesan uza forsa exesivu la nesesáriu, proporsionál no la tuir Dekretu Lei n.º 43/2011 kona-bá rejime jurídiku uza forsa ne’ebé regula atuasaun forsa seguransa-sira.

Ba governasaun di’ak ho kategoria violasaun administrasaun la di’ak, reprezenta violasaun governasaun di’ak hosi autoridade públika-sira hanesan líder komunitáriu, autoridade munisipál no rejiaun, autoridade ministeriál  sira, inklui PNTL, laiha sistema kontrolu sba sira ne’ebé efetivu iha serbisu fatin, nomós laiha informasaun sufisiente  ba subordinadu-sira inklui sidadaun no parte relevante-sira relasiona atu asesu ba serbisu públiku.

Aleinde ne’e, akontese mós violasaun governasaun di’ak relasiona ho kategoria ‘Sees hosi podér’ iha serbisu públiku tanba funsionáriu públiku ida uza ninia kargu, hodi fó benefísiu ruma ba ema ida-ne’ebé laiha direitu atu hetan benefísiu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here