Xefe suku Triloka, postu admistrativu Baucau villa, munisípiu Baucau, Alexandre da Costa. Imajen TATOLI/Natalino Belo

BAUCAU, 24 juñu 2021 (BAUCAU)–Xefe suku Triloka, postu admistrativu Baucau villa, munisípiu Baucau, Alexandre da Costa, konsidera prezensa To’os ba Moris Di’ak (TOMAK) iha suku ne’e bele kontribui aumenta rendimentu família tamba bele prodús ai-han no fa’an produtu iha merkadu.

“Programa ne’e bele hasa’e nutrisaun no aumenta kuantidade produtu, nune’e bele hasa’e rendimentu hodi sustenta sira-nia uma laran,” Xefe suku hateten iha edifísiu postu admistrativu Baucau villa antiga, kinta ne’e.

Notísia relevante: TOMAK estabelese programa ai-han nutrisaun iha suku neen postu Baucau

TOMAK liuhosi grupu ne’ebé estabelese iha suku Triloka hahú implementa programa agrikultura iha tinan 2017 liubá.

Nune’e, grupu agrikultór hahú kuda fore-rai, ne’ebé hanesan ezemplár ho medida metru 50×50, tau-matan ba ai-han ne’ebé kuda iha to’os hafoin kolleta no hatutan hodi kria grupu foun atu nafatin iha kontinuasaun.

“Hanorin mós grupu sira halo tempe no tahu, hafoin fa’an ba agrikultór sira,” nia akresenta.

Programa TOMAK mós kontribui ona redús má nutrisaun iha suku ne’e.

Totál grupu agrikultór TOMAK iha suku Triloka hamutuk neen, kompostu hosi grupu kuda ai-han, produsaun tempe no tahu inklui grupu tein hahán ba labarik sira ne’ebé ho kategoria má nutrisaun.

Iha fatin hanesan, Jerente TOMAK munisípiu Baucau, Isac Ribeiro Ximenes, hateten, daudaun estabelese ona programa nutrisaun iha suku neen iha postu admistrativu Baucau villa.

Suku neen hanesan Bucoli, Triloka, Gariuai, Uailili, Samalari, no Buruma, estabelese programa rua hanesan agrikultura no nutrisaun.

Programa ne’e daudaun foin iha faze dahuluk, ne’ebé implementasaun hahú iha tinan 2017 no sei implementa iha tinan 10 ba oin iha Baucau.

Jornalista : Natalino Belo

Editora    : Julia Chatarina

HAKEREK NO HATÁN

Please enter your comment!
Please enter your name here