Reuniaun kona-ba preparasaun Estadu Timor-Leste ba simeira internasionál kona-ba ai-han ka Food Summit System Dialogue, Food for Growth and School Feeding Coalitions. Imajen/Espesiál

DILI, 24 juñu 2021 (TATOLI)-Ekipa Task Force SUN Movement ne’ebé kompostu hosi Ajénsia Nasoins Unidas, organizasaun bilaterál no Forum NGO Timor-Leste, kinta ne’e, hala’o diskusaun  kona-ba preparasaun Estadu Timor-Leste ba simeira internasionál kona-ba ai-han ka Food Summit System Dialogue, Food for Growth and School Feeding Coalitions.

Pontu Fokál Polítika SUN Movement, Filipe da Costa hateten, preparasaun ne’ebé daudaun sira diskute ne’e sei hamutuk mós pontu fokál hanesan Ministériu Agrikultura no Peska, no Food Agricultural Organization (FAO) atu halo diálogu-ida kona-ba Pilot Konsellu Nasionál Seguransa Alimentár no Soberania Ai-han Timor-Leste (KONSANTIL), ne’ebé hanesan intervensaun ida hodi dada la hetan apoiu sira.

Maneira ida hodi dada apoiu hosi liña ministeriál no parseiru dezenvolvimentu sira, hodi hato’o SUN-nia planu asaun iha The Timor-Leste Development Partners Meeting (TLDPM) ne’ebé sei aprezenta Consolidated National Action Plan for Nutrition and Food Security (CNAP-NFS) ne’ebé atualiza ona nia tarjetu ba indikadór sira.

“Iha reuniaun ne’e ekipa deside atu halo matadalan ida-de’it ba Food Summit System Dialogue, Food For Growth no School Feeding Coalitions hodi aprezenta iha Konsellu Ministru, ita sei hato’o pedidu atu sira aprova kona-ba tarjetu no indikadór ne’e no prosesu planu ne’e Konsellu Ministru aprova ona, iha futuru ita adopta no mós alokasaun fundu,” Filipe da Costa hateten liuhosi komunikadu imprensa ne’ebé Agência Tatoli asesu, kinta ne’e.

Iha reuniaun ne’e, ekipa SUN Movement mós deside ona sei halo diálogu dahuluk iha loron 05 jullu, tinan ne’e, kona-ba Global Action Plan on Child Wasting, diálogu ne’ebé sei lidera hosi Ministériu Saúde no apoiu téknika hosi organizasaun Nasoins Unidas.

Iha enkontru ne’e ekipa task force team hosi FAO, Paula Lopes da Cruz aprezenta Food System Summit Dialogue ne’ebé introdús inisiativa global hodi tau matan ba labarik sira krekas-liu (wasting) no enkuadramentu global ho nia alvu atu redús númeru insidénsia labarik ne’ebé moris ho pezu ki’ik liu, hadi’a saúde labarik sira nian, hadi’a alimentasaun ba labarik hahú hosi tinan zero to’o 12, no halo tratamentu ba kazu wasting.

“Ajénsia ONU-FAO prepara ona ezbosu ida kona-ba Food System Summit diálogu ba Governu hala’o ona iha fulan fevereiru 2021 hodi ekipa diskute kle’an liután molok aprezenta ba Konsellu Ministru, no tuir mai halo diálogu-ida ho parte interesada sira atu dokumentu ne’e sai matadalan nasionál-ida ba Food System ne’ebé governante sira sei aprezenta iha simeira,” Filipe da Costa informa.

Objetivu final mak xefe Estadu sira sei konkorda ba rezultadu boot tuir mai, no kompromisu nasaun idak-idak nian atu foti asaun inovativu iha nasionál hodi kontinua tranzmite asuntu ne’e iha diálogu públiku sira, no fin simeira ne’e atu deklarasaun global ba nasaun hotu, no kada nasaun estabelese sistema hodi atualiza kompromisu sira ne’ebé konkorda malu.

Iha reuniaun ne’e ekipa deside atu prodús programa Food Summit System Dialogue, Food For Growth and School Feeding Coalitions atu sai matadalan ida de’it hodi aprezenta ba Konsellu Ministru no hala’o sosializasaun bainhira aprovadu ona ba parte interesada sira molok governante ka xefe Estadu aprezenta iha simeira refere.

Jornalista       : Arminda Fonseca

Editór             : Francisco Simões

 

HAKEREK NO HATÁN

Please enter your comment!
Please enter your name here