Diretór Ezekutivu TIC Timor, I.P, Roberto Caitano de Sousa Vicente. Imajen TATOLI/Francisco Sony

DILI, 24 juñu 2021 (TATOLI)Diretor Ezekutivu Agência de Tecnologia da Informação e Comunicação TimorInstitutu Públiku (TIC Timor, I.P), Roberto Caitano de Sousa Vicente, relata progresu serbisu no ezekusaun orsamentu tinan ne’e ba Primeiru-Ministru (PM), Taur Matan Ruak.

“To’o ohin ezekusaun orsamentu 2021 TIC nian ladún tuir espetativa, liu-liu iha trimestre daruak nian, loloos no tuir meta tenke etinje ona 50% maibé realidade seidauk to’o no foin 25% hosi ezekusaun tomak, tanba ne’e ami tenta hela atu aselera maibé posibilidade sei la to’o alvu ne’ebé define,” Diretór Ezekutivu TIC Timor, relata hafoin hasoru malu ho PM iha Palásiu Governu.

TIC Timor hanesan ajénsia ne’ebé espesífiku ba área teknolojia, ne’ebé halo mós investimentu ne’ebé foku ba teknolojia nian.

“Iha projetu balun to’o agora seidauk bele atinje tuir espetativa tanba iha lakuna balun, nune’e ezekusaun projetu ne’ebé sai ona espetativa TIC nian atraza no seidauk bele finaliza. Kuandu labele finaliza maka kontribui ba ezekusaun orsamentu tinan ne’e,” nia akresenta.

Hafoin relata progresu atividade, Xefe Governu orienta atu esforsu ezekuta orsamentu ho di’ak iha trimestre datoluk.

Tuir Roberto Caitano, bainhira to’o tinan nia rohan mak instituisaun ne’e labele ezekuta orsamentu tuir meta, maka sei implika ba orsamentu tinan oin.

“Tuir instrusaun, tenta iha trimestre datoluk ezekuta hodi atinje meta, nune’e labele iha implikasaun boot ba redusaun orsamentu TIC iha tinan 2022,” nia subliña.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here