Sekretario Rejionál Asuntu Teras Propriedade, Antonio Hermenegildo da Costa, Imajen Tatoli/Abilio Elo Nini.

OÉ-CUSSE, 24 Juñu 2021 (TATOLI)—Sekretáriu Rejionál Asuntu Teras Propriedade, Antonio Hermenegildo da Costa, hateten Departamentu Planu Ordenamentu Teritóriu no Kadastru identifika ona fatin risku ba dezastre naturál hamutuk 95 iha sub-rejiaun Pante Makasar no Oésilo.

Nia hatutan, hafoin akontese inundasaun iha loron 4 abríl foin lalais ne’e iha RAEOA, nia parte hala’o ona identifikasaun ba área sira-ne’ebé mak persiza proteje ba iha futuru atu labele fó ameasa ba komunidade liuhosi inundasaun, mota sobu no rai halai.

“Komunidade harii uma no to’os iha mota ninin, halo uma iha foho lolon, ita identifika ona hamutuk fatin ka pontu 95. Fatin sira-ne’e iha sub-rejiaun Pante Makasar hahú hosi Ponte Noefefan to’o mota Noel-Ekat, sub-rejiaun Oésilo,” Antonio Hermenegildo da Costa informa ba Agência TATOLI, iha nia servisu fatin, bairru Sikluli, suku Costa, kinta ne’e

Durante ne’e, nia dehan, halo ona identifikasaun ba área sira-ne’e mak fatin besik mota Ponte-Noefefan, suku Costa, sub-rejiaun Pante Makasár ba to’o iha Mota Noel-Eka iha suku Bobometo, sub-rejiaun Oésilo nomós Mota Tono Nunuheno, tesik sa’e ba Nun-Ana.

“Ordenamentu territóriu planeia ona atu fó hanoin ba komunidade sira, ita sei tau plaka hodi fó hatene ba komunidade labele hela iha fatin risku ba dezastre naturál ne’e,” nia hateten.

Tanba, nia dehan, daudaun ne’e iha área risku sira-ne’e populasaun barak halo uma besik mota ninin, ponte okos, foho lolon, halo to’os iha mota laran, halo uma besik lagoa no tasi ninin, ne’ebé sai risku ba dezastre naturál.

Iha tinan ida-ne’e, parte Governu sei fó prioridade atu proteje fatin hirak ne’e hodi harii kuadru avizu, nune’e bele fó hanoin ba komunidade atu halo distánsia ba rai maran kuaze metru 25 hosi mota inklui labele halo atividade tesi ai-horis sira no halo uma iha mota ninin, hodi minimiza inundasaun ka mota sa’e.

Informasaun ne’e, nia parte informa ona ba autoridade lokál sira hanesan jestor sub-rejiaun, xefe suku no aldeia sira atu habelar informasaun ba komunidade hodi asegura-an hosi fatin risku. Autoridade RAEOA mós hanoin ona sei hala’o mós identifikasaun ba fatin risku iha sub-rejiaun Pasabe no Nitibe.

Ba komunidade ne’ebé harii uma iha fatin risku sira-ne’e, Guvernu liu-hosi Sekretário Estadu Protesaun Sivíl (SEPS) sei uza lei protesaun sivíl númeru 12/2020, 2 dezembru, hodi kriminaliza komunidade ne’ebé harii uma iha fatin risku ba dezastre naturál, hanesan mota ninin, foho lolon, tasi ninin no besik lagoa.

Iha artigu 21 ne’e ko’alia kona-bá utilização, do solo ka uza rai, fó biban ba protesaun sivíl servisu hamutuk ho instituisaun-sira hanesan Dirasaun Nasionál Teras no Propriedade (DNTP), Ministério Planu Ordenamentu (MPO), no Sekretáriu Estadu Ambiente (SEA) atu halo medida prevensaun liuhosi tau plaka nu’udár aviza no fó atensaun ba komunidade ne’ebé hela iha fatin risku dezastre-nian.

Notísia Relevante: Lei protesaun sivíl foun, kriminaliza harii uma iha fatin risku

Jornalista : Abilio Elo Nini

Editor       : Cancio Ximenes

HAKEREK NO HATÁN

Please enter your comment!
Please enter your name here