Lider Karismátiku Kay Rala Xanana Gusmão simu ona vasina Sinovac iha klinika Fatumeta, Dili, kinta (24/06). Imajen/Facebook: Mariano Costa.

DILI, 24 juñu 2021 (TATOLI)—Primeiru-Ministru, Taur Matan Ruak, kontente Lider Karismátiku Kay Rala Xanana Gusmão simu ona vasina Sinovac iha klinika Fatumeta, tanba ida-ne’e hatudu ezemplu di’ak ba sidadaun hotu-hotu atu tuir Avó Xanana.

Notísia Relevante: Xanana husu ema hotu simu vasina atu salva-an hosi COVID-19

“Ha’u kontente loos. Tanba ne’e, fó ezemplu di’ak loos ba iha ita hotu-hotu atu tuir buat ne’ebé Avó Xanana halo hodi kontribui simu vasina. Tanba, hanesan Ministériu Saúde nia motto dehan ‘Ita-nia saúde iha ita-nia liman rasik’. Tanba ne’e, ha’u husu parabéns parabens no obrigadu barak,” Taur Matan Ruak hateten ba jornalista sira hafoin hala’o enkontru semanál ho Prezidente Repúblik, Francisco Guterres Lú Olo, iha Palásiu Prezidensiál Nicolau Lobato, Bairru Pite, Dili, kinta ne’e.

Aleinde ne’e, Xefe Governu mós hato’o agradesimentu ba jornalista sira-nia kontribuisaun hodi halo kobertura ba kampaña vasinasaun iha Timor-Leste. 

“Ha’u husu no agradese imi-nia kontribuisaun liu-liu jornalista sira-nia kobertura ba ita-nia kampañia vasinasaun iha ita-nian rain. Ne’e importante loos, atu redús kazu sira-ne’ebé ita iha, fó liberdade normalizasaun uitoan ba ita-nia atividade sira no mós hadia ita-nia moris,” nia dehan.

Tuir Taur, partisipasaun iha vasina ne’e importante tebes tanba liuhosi vasina mak bele halo redusaun ba COVID-19 ne’e.

“Ha’u hanoin partisipasaun iha vasina importante loos no tanba de’it moras COVID-19 ita halo Estadu Emerjénsia ba dala XIV ona no fulan oin sa’e ba XV. Iha dala XIV nia-laran ne’e limita ita-nia liberdade no lori lei limita ita-nia direitu sira. Entaun, ha’u hanoin ita presiza vasina para neutraliza ajuda diminui moras, entaun ita-nia partisipasaun ne’e importante loos,” Taur hateten.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here