Polísia Unidade Tránzitu prende karreta Toyota Rava, númeru matrikula A13442 iha area Hudi-laran tanba kontra sinais tránzitu, kinta 07 janeiru 2021. Imajen Tatoli/António Gonçalves

DILI, 24 juñu 2021 (TATOLI)— Suspeitu mane ida ho inisiál LPA ne’ebé ho karreta hodi soke mate Renato Viera de Jesus (45) iha kuarta (23/06) dader iha área estrada California, suku Kuluhun, Dili, entrega-an ona ba Polísia Sientífika Investigasaun Kriminál (PSIK).

Suspeitu halai karreta ho velosidade aas no soke Renato Viera monu ho kondisaun mate kedan, tanba isin lolon no ulun pankada makás iha alkatraun.

Notísia relevante:Semana kotuk, PNTL rejista insidente 21 no asidente neen

“Hafoin soke matebian, suspeitu halai entrega-an kedan ba PSIK no halo ona indentifikasaun atu hein prosesu ba Ministériu Públiku,” Komandante Polísia munisípiu Dili, Superintendente Xefe, Henrique da Costa, hateten ba jornalista-sira iha Komandu PNTL Caicoli, kinta ne’e.

PNTL Dili mós simu ona keixa hosi família matebian, hodi halo koordenasaun ho MP atu prosesa kazu ne’e.

Daudaun-ne’e suspeitu LPA sei submete hela prosesu investigasaun oras 72 iha PSIK hodi hein prosesu ba Tribunál.

Matebian Renato Viera Araújo hetan soke, hafoin sai hosi ninia uma hala’o ezersisiu ba área Kuluhun no atu fila ona ba nia uma iha área Toko Baru II.

Matebian durante ne’e serbisu iha kompañia East Timor Trading iha Delta I, mate hosik hela feen kaben, Fernanda Miguel Hendrique Simões no oan na’in-hitu, mane tolu no feto na’in-haat.

Manuel Araújo nu’udár maun boot hosi matebian, husu ba polísia atu prosesa kazu ne’e tuir lei, tanba suspeitu soke tiha matebian halai hosik hela vítima latan iha estrada.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here