Xefe suku Triloka, postu admistrativu Baucau villa, munisípiu Baucau, Alexandre da Costa. Imajen TATOLI/Natalino Belo

BAUCAU, 24 juñu 2021 (BAUCAU)—Xefe suku Triloka, postu admistrativu Baucau villa, munisípiu Baucau, Alexandre da Costa, hateten, Ministru Administrasaun Estatál (MAE), Miguel Pereira de Carvalho, sei lansa fatuk dahuluk Uma Kbiit Laek iha aldeia Aubaka, suku Triloka, semana oin.

“Uma Kbiit Laek suku Triloka iha benefisiáriu tolu, la kleur tan iha loron 01 jullu, Ministru Admistrasaun Estatál atu halo lansamentu fatuk dahuluk ba uma tolu ne’e inklui inaugura mós moru eskola ho orsamentu hosi Programa Nasionál Dezenvolvementu Suku (PNDS),” Xefe suku Triloka, informa iha edifísiu Administrasaun postu Baucau villa antiga, kinta ne’e.

Notísia relevante: 28 juñu, lansa fatuk dahuluk ‘Uma Kbiit Laek’ iha Baucau

Antes ne’e, Diretora PNDS munisípiu Baucau, Aurea Viegas, hateten, antes atu hahú implenta Uma Kbiit Laek, PNDS Baucau orienta tuir livru matadalan ne’ebé guia, hanesan kritéria ba benefisiáriu ne’ebé mak autoridade lokál sira mak envolve direita iha ekipa verifikadór, lidera hosi xefe aldeia, Ofisiál Polísia Suku (OPS) no reprezentante joven na’in-ualu hosi kada suku.

“PNDS la la’o mesak, iha kooperasaun másimu ho autoridade suku,” nia dehan.

Totál orsamentu Uma Kbiit Laek ba suku ida hetan $54.000, ne’ebé fahe ba kustu operasionál $3.000 no kustu infraestrutura $51.000, tuir tipu uma.

Uma Kbiit Laek iha tipu rua bazeia ba kritéria, ne’ebé ho montante la hanesan, 48m² ho kustu $17.000 no 37m² ho kustu entre $14.000 to’o $16.000.

Notísia relevante: 2021, Governu sei konstrui uma 177 ba “Kbiit Laek” iha Baucau

PNDS Baucau rasik tuir alvu sei konstrui uma hamutuk 177 iha tinan 2021, ne’ebé hosi totál ne’e, suku 59 iha munisípiu Baucau sei konstrui uma tolu iha kada suku.

Suku Triloka kompostu hosi aldeia haat hanesan Aubaka, Baduho’o, Makadae no Likiloiwatu, ho totál populasaun hamutuk 2.732.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here