Sede suku Purugua, postu administrativu Cailaco, munisípiu Bobonaro ne’ebé iha hela faze rahabilitasaun to’o ona pursentu 80. Imajen Tatoli/Sérgio da Cruz.

BOBONARO, 24 juñu 2021 (TATOLI)—Rehabilitasaun ba sede suku Purugua, postu administrativu Cailaco, munisípiu Bobonaro, atinje ona 85%  no sei finaliza iha tempu badak.

Fundus ba rehablitasaun ne’e mai hosi Orsamentu Jerál Estadu (OJE) 2019 ho montante $12.647,25.

Notísia relevante:OJE 2021, Bobonaro ezekuta ona 27.65%

Orsamentu ne’e utiliza hodi troka kalén, troka baza, monta plafón, arus oda-matan ho janela inklui azulezu ho gastu hamutuk $11.647,25 no operasional $1.000.

Tuir relatóriu suku, hosi totál orsamentu ne’e, ezekuta ona $4.000 restu $8.0647, 25 sei uza hodi monta plafon, azulezu no elementu asesiblidade ba ema ho defisiénsia.

Xefe suku Purugua, Claudino Berre Pelu, hateten rehablitasaun ne’e iha hela faze monta plafon no asesiblidade ba ema ho defisiénsia, no autoridade lokál sei informa ba parte Programa Nasionál Dezenvolvimentu Suku (PNDS) munisípiu Bobonaro, atu mai haree fila-fli progresu serbisu.

“Progresu serbisu ne’e ita bele haree persentajen, bainhira duku tiha kalén, ne’e tama ona ba 80%,” autoridade lokál ne’e informa ba jornalista Agência Tatoli, via telefónika, kinta ne’e.

Autoridade lokál ne’e mós agradese ba Governu tanba responde ona preokupasaun ne’e, no husu atu kontinua apoia suku tanba autoridade lokál mak liman-ain Estadu iha baze.

Obra ne’e konstrui hosi bada’en lokál suku-nian, fahe ba grupu tolu mak hetan fiar hosi PNDS atu halo rehablitasaun to’o finaliza.

Reabilitasaun ne’e rasik re-dezeña tuir modelu tékniku PNDS, ne’ebé kompleta ho prototipu no elementu asesiblidade ba ema ho defisiénsia hosi programa fundu rezilénsia ne’ebé implementa iha 2021.

Suku Purugua ho nia aldeia rua mak hanesan Lesupuh no Heda ho totál populasaun hamutuk 1.190.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here