Vasina AstraZeneca. Imajen Tatoli/Francisco Sony

VIQUEQUE, 24 juñu 2021 (TATOLI)- Populasaun iha Suku Matahoi ho Suku Uaitame, Postu Administrativu Uatulari, Munisípiu Viqueque, entuziazmu simu vasina, maske antes ne’e, sira ta’uk no rejeita atu simu vasina.

Komunidade sira iha Matahoi ho Uaitame, maioria foti kestaun no rejeita simu vasina tanba sira rona boatu katak vasina ne’e ladi’ak no bele habak sira-nia moris, no boatu balun hateten simu vasina bele la ko’us. Maibé bainhira autoridade sira halo beibeik sensibilizasaun ba komunidade sira kona-ba vantajen hosi vasina ne’e nu’udar korajen ba komunidade hakarak simu vasina.

Xefe Suku Matahoi, António Amaral, informa autoridade suku na’in-neen, administradór postu, komandante eskuadra Polísia Nasionál Timor-Leste (PNTL) Postu Uatulari hamutuk ho pesoál saúde kuaze loron-loron halo enkontru ho komunidade no enkontru nivel autoridade nian iha sentru saúde hodi partilla informasaun vasina ba vasina ne’e ho ninia espetativa iha komunidade.

“Ami simu tiha informasaun vasina no ami tun ba fali baze partilla informasaun vasina nian ba komunidade sira. Iha ha’u-nia suku iha aldeia Uasufa bainhira halo sensibilizasaun vasina nian ami simu sujestaun barak hosi komunidade,” Xefe Suku António Amaral, hateten ba Agência Tatoli iha sentru saúde Uatulari, kinta ne’e .

Komunidade balun rejeita simu vasina tanba  ta’uk ho boatu oioin, liuliu dehan sira bele mate sedu no balun fali dehan ta’uk tanba bele la ko’us oan.  Maske nune’e, bainhira sira hatene tiha vantajen boot hosi vasina ne’e, agora hotu-hotu prontu ona atu simu vasina doze dahuluk.

Iha fatin hanesan, Xefe Suku Uaitame, José do Rosario relata, iha Suku Uaitame komunidade sira hakarak simu vasina no agora daudaun komunidade ne’ebé simu vasina totál hamutuk na’in-100, hahú hosi loron 21 to’o 23 juñu.

“Ha’u-nia komunidade-sira hotu interese hakarak atu simu vasina, maibé ai-moruk vasina mak limitadu tebes,” nia tenik.

Jornalista       : Vitorino Lopes da Costa
Editór             : Francisco Simões