Xefe Suku Uaitame, Postu Administrativu Uatulari, Munisípiu Viqueque, José do Rosário. Imajen Tatoli/Xisto Freitas

VIQUEQUE, 24 juñu 2021 (TATOLI)- Projetu perfurasaun bee-moos iha Suku Uaitame, Postu Administrativu Uatulari, Munisípiu Viqueque, seidauk bele finaliza tuir alvu serbisu, tanba enfrenta obstákulu boot, liuliu kona-ba mobilizasaun sasán no ekipamentu iha situasaun pandemia COVID-19, serka sanitária no konfinamentu obrigatóriu.

Notísia Relevante : Suku Uaitame sei prioridade hadi’a infraestrutura bázika hosi PNDS

“Tuir lolos projetu prepurasaun bee-moos ba komunidade suku Uaitame nian ne’e finaliza iha  2020, maibé mosu pandemia global ne’e impede serbisu Programa Nasionál Dezenvolvimentu Suku (PNDS) implementa projetu perfurasaun bee-moos ba komunidade Suku Uaitame,” Xefe Suku Uaitame, José do Rosario, informa ba Agência Tatoli, iha Aldeia Maukiak, Suku Matahoi, kinta ne’e.

José hatutan, projetu prefurasaun bee-matan kuaze atinje  90%, maibé bomba xupa bee ba tanki mak to’o agora seidauk mai tanba mosu serka sanitária hela no la iha espasu atu halo movimentu ba ekipamentu.

Durante ne’e  populasaun Uaitame hamutuk uma-kain 40-resin  problema bee-moos. Maske ho situasaun sira hanesan autoridade lokál nafatin halo observa projetu ba perfurasaun bee-moos no mós halo nafatin koordenasaun ho parte fornesedór sira lori mákina bee nian hodi finaliza projetu atu komunidade bele asesu ba bee-moos.

Projetu perfurasaun bee-moos ne’e fundu hosi PNDS montante $35.131,68 no implementa projetu ne’e observa hosi ekipa jestaun suku (EJS) hamutuk ho komunidade suku Uaitame.

Jornalista       : Vitorino Lopes da Costa
Editór             : Francisco Simões