Kondisaun uma iha merkadu Batugade, kinta (24/06/21). Imajen Tatoli/Sérgio da Cruz.

BOBONARO, 24 juñu 2021 (TATOLI)—Negosiante merkadu lokál Batugade, postu administrativu Balibo, munisípiu Bobonaro, husu Governu atu konstrui uma ne’ebé dignu, tanba kondisaun uma iha merkadu atuál la seguru.

Negosiante, Ermelinda Perreira, konsidera kondisaun uma merkadu ne’e la seguru tanba kalén barak mak ko’ak no negosiante-sira labele rai hodi fa’an sira-nia produtu.

Notísia relevante:Fulan lima, Alfándega Batugade hatama reseita $244.642

“Ami faan sasan mós la di’ak. Agora animal tama-sai arbiru, dalaruma sasan rai iha kalan ema na’ok, balum fahi mak han,” negosiante ne’e hateten ba jornalista Agência Tatoli, iha merkadu Batugade, kinta ne’e.

Nune’e mós Margarida Eugénia, hateten uma merkadu ne’e uzadu tinan barak ona, maibé obrigadu tenke kontinua utiliza ba atividade negósiu tanba laiha opsaun seluk.

“Ami terus liu mak iha tempu udan, baibain sasan bokon hotu. Maski nune’e ami uza nafatin tanba fatin mak ne’e de’it ona,” nia hateten.

Kona-ba rendimentu negosiante-sira iha merkadu ne’e, antes tama situasaun COVID-19, loron ida bele hetan to’o $10, maibé durante situasan Estadu emerjénsia rendimentu kada loron la to’o $5.

Produtu lokál ne’ebé negosiante-sira faan iha merkadu ne’e mak hanesan, modo kanko, mostarda, lakeru, koto, liis, baria, fehuk roupa, hudi, ai-farina no produtu lokál sira-seluk.

Oras-ne’e daudaun, fasilidade sanitária iha merkadu ne’e mós laiha, no negosiante sira mós uza de’it bee posu iha komunidade ne’ebé hela besik iha área ne’e.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here