Ministru Koordenadór Asuntu Ekonómiku (MKAE), Joaquim Amaral. Imajen TATOLI/Francisco Sony

DILI, 24 juñu 2021 (TATOLI)Ministru Koodenadór Asuntu Ekonómika (MKAE), Joaquim Amaral, otimista tinan ne’e bele finaliza revizaun lei tolu liga ho atividade komersiál setór privadu iha rai-laran, nune’e bele hetan aprovasaun iha Konsellu Ministru.

“Ha’u fiar katak tinan ne’e lejizlasaun tolu bele hetan ona aprovasaun, nune’e bele loke oportunidade ba investidór no negosiante sira bele halo atividade,” Ministru Joaquim hateten ba Agência TATOLI, iha Gabinete MKAE, iha Palásiu Governu, kinta ne’e.

Proposta revizaun maihosi Servisu Rejistu Verifisaun Emprezariál (SERVE), ba lei tolu hanesan Lei Sosiedade Komersiál, Lei Rejistu Komersiál no Lei Atividade Ekonómiku, ne’ebé submete ina ba MKAE iha jullu 2020.

“Polítikamente ita aprova ona no agora halo hela analiza no apresiasaun ba lejizlasaun ne’e, tanba lei hirak ne’e tama ona iha planu lejizlasaun 2021, tanba ne’e ita hein katak buat hotu la’o tuir kalendáriu, bele aprova inklui halo reforma balun atu fó fatin ba ambiente negósiu,” nia subliña.

Lei tolu ne’e sei fó oportunidade ba setór privadu no investidor sira halo atividade ekonómika iha rai-laran di’ak liután hodi bele hatama reseita ba Timor-Leste.

SERVE konsidera iha nesesidade atu halo revizaun tanba hakarak atrai investidór sira halo atividade ekonómika no iha tempu hanesan haree katak hafoin ezisténsia iha tinan-hitu kontribuisaun setór privadu ba Estadu boot tebes.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here