Ministru Koordenadór Asuntu Ekonómiku (MKAE), Joaquim Amaral. Imajen TATOLI/Francisco Sony

DILI, 24  juñu 2021 (TATOLI)—Ministru Koodenadór Asuntu Ekonómika (MKAE), Joaquim Amaral, konsidera Lei Parlamentu 14/2011, Lei Investimentu Privadu ajuda fasilita investidór hala’o sira-nia atividade maski iha situasaun COVID-19 no rekuperasaun dezastre naturál.

“Lei Investimentu fasilita no ajuda tebes investidór sira ne’ebé halo investimentu iha Timor-Leste, tanba ita kompara ho nasaun Sudeste Aziátiku, iha taxa ne’ebé ha’u hanoin ajuda tebes investidór, nune’e sira bele nafatin  halo investimentu iha ita-nia rai,” Ministru Joaquim Amaral hateten ba Agência TATOLI, iha Gabinete MAKE, iha Palásiu Governu, kinta ne’e.

Nia deskreve, bainhira investidór ida atu halo investimetu iha Dili, tinan-ualu maka foin selu taxa, maibé fora hosi Dili hanesan iha Rejiaun Administrativa Espesiál Oé-cusse Ambeno (RAEOA) bele selu taxa tinan-ualu to’o sia.

“Ha’u hanoin ida-ne’e maka fasilita tebes investidór sira atu investe iha Timor-Leste,” nia akresenta.

Aleinde ne’e, Ajénsia Promosaun Investiimentu no Exportasaun (TradeInvest) sempre halo promosaun ba investimentu no kontinua identifika área potensiál ne’ebé Timor-Leste iha atu investe.

“Ita iha área potensiál investimetu barak, ha’u hanoin TradeInvest bele ajuda halo promosaun área pontisiál iha Timor-Leste,” nia hatutan.

Lei Parlamentu 14/2011, Lei Investimentu Privadu, iha kapítulu iv Benefísiu no Insentivu iha artigu 21 kona-ba benefísiu fiskál, deskreve katak empreza asosiada iha projetu investimentu ida ka halo reinvestimentu, bele goza izensaun ba impostu sobre rendimentu ho valór 100% ba períodu ne’ebé define ona.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here