DILI, 24 juñu 2021 (TATOLI) – Sekretáriu Estadu Arte no Kultura (SEAK), Teófilo Caldas, louva kargu xefia sira iha Sekretaria Estadu Arte no Kultura ho mós kargu xefia sira Ministériu Ensinu Superiór, Siénsia no Kultura (MSSSK) tanba to’o agora la komete irregularidade ka infrasaun ruma kona-ba administrasaun, finansas no patrimóniu.
Notísia Relevante : Kargu xefia iha MESSK aprezenta rikusoin ba CAC
“Primeiru ha’u fó parabens bá kargu xefia sira hosi MESSK ho SEAK tanba to’o iha 22 juñu 2021, ha’u ho ministru Longuinhos kompleta ona ami nia mandatu tinan tolu, maibé seidauk iha kargu xefia ida mak komete infrasaun iha irregularidade iha jestaun administrasaun, finansa no patrimóniu,” Sekretáriu Estadu Teófilo Caldas hateten ba jornalista sira iha otél Novo Turizmu, Dili, kinta ne’e.
Nia husu nafatin ba kargu xefia sira iha SEAK ho MSSK atu mantein ritmu serbisu ne’ebé la lori risku administrativa no risku judisiáriu ba ida-idak nia an no ba instituisaun nia prestasaun.
Membru governu ne’e esplika katak dezempeñu di’ak hatudu ona hosi kargu xefia sira, maibé nafatin ezije labele haluha kumpre nafatin dekretu Governu númeru 8/2003 kona-bá utilizasaun patrimóniu Estadu no garante Governasaun di’ak.
“Atu garante Governasaun di’ak, Teófilo Caldas afirma, dalan úniku hanesan kargu xefia tenke komprende didi’ak direitu no devér no hanesan kargu xefia hetan priviléjiu hosi Estadu tanba bele utiliza karreta ka motór Estadu ba fins profisionál
Iha fatin hanesan Komisáriu Komisaun Funsaun Públika (CFP), António Freitas, hateten kuaze fulan-neen (6)-resin ekipa konjunta (ekipa quarte laterál) la halo fiskalizasaun no inspesaun ba uzu patrimóniu Estadu (karreta no motór Estadu) tanba kumprimenta hela bá serka sanitária no konfinamentu obrigatóriu.
Iha tempu iha medida serka sanitaria no konfinamentu obrigatóriu ne’e fo autorizasaun atu uzu veíkulu Estadu espesialmente ba sira liña frente, tanba ne’e la halo inspesaun ba atividade ne’e.
Sei leilaun patrimóniu Estadu balun
Ministériu Ensinu Superiór, Siénsia no Kultura (MESSK) no Sekretáriu Estadu Arte Kultura (SEAK), tinan ne’e, sei loke prosesu leilaun ba públiku no internal kona-bá karreta neen (6), motór hitu (7), komputadór 20 no AC 10 atu poupa orsamentu Estadu nian.
Inspetór Jerál MESSK, Higinio Alves hateten, patrimóniu Estadu ne’ebé sei tama prosesu leilaun ne’e tanba kustu manutensaun ba viatura inklui komputadór no AC boot liu kompara sosa foun.
Molok leilaun sei aprezenta hosi Patrimóniu Estadu, depois mak dirasaun Finansas Ministériu nian sei haree. Ne’eduni, Dirasaun Inspesaun Jerál sei serbisu hamutuk ho Patrimóniu Estadu hodi aselera prosesu sira.
Jornalista : Tomé Amado
Editór : Francisco Simões
