BOBONARO, 24 juñu 2021 (TATOLI)—Mákina x-ray unidade rua iha postu integradu fronteira Batugade, postu administrative Balibo, munisípiu Bobonaro kontinua avaria, no la funsiona to’o ohin loron.
Situasaun ne’e prezudika autoridade Aduaneira atu halo atendimentu liuliu pasa revista ba sasán importadu hosi Indonézia mai Timor-Leste (TL).
Notísia relevante:Fulan lima, Alfándega Batugade hatama reseita $244.642
Mákina rua ne’e mak hanesan, X-ray Guntry Simited detection avaria iha 2017 to’o agora no Hand Cary simited detectiom avaria iha 2020.
Manajer fasilitadór postu integradu fronteira Batugade, autoridade Aduaneira, Joaquim Taek Lau, informa daudaun-ne’e ekipa uza de’it mákina X-Ray hand Cary Meuatecd, hodi halo atendimentu ba pasajeiru-sira hosi Timor-Leste ba estranjeiru.
Makina X-ray Guntry simited detection ninia funsaun atu halo Scan ba sasan importadu ne’ebé ho kuantidade bot, hand Cary simited detenction ninia funsaun atu detekta sasan kontra bandu ne’ebé pasajeiru-sira hodi tama mai Timor-Leste, enkuantu X-Ray hand cary Meautecd ninia funsaun atu Scan sasan ne’ebé pasajeiru-sira atu lori sai hosi Timor-Leste.
“Durante ne’e mákina rua ne’e la halo operasaun, entaun ekipa halo de’it atendimentu ho manuál,” Joaquim Taek Lau, hateten ba jornalista Agência Tatoli, iha Batugade, kinta ne’e.
Nia dehan, situasaun ne’e prezudika tebes serbisu Alfándega, tanba halo de’it inspesaun ba sasan-sira ho sistema manuál, bainhira karreta tama tenke hatun sasan no halo tiha inspesaun mak tula fali.
Kona-bá sasán ne’ebé pasajeiru-sira lori ho kuantidade kiik, halo inspesaun uza hotu mákina X-ray hand cary meautec.
Postu integradu fronteira Batugade mós iha jeradór automatik ida atu bele uza bainhira eletrisidade mate.
Autoridade Aduaneira hato’o ona proposta ba Governu atu sosa fali mákina foun hodi substitui mákina ne’ebé avaria nune’e bele fasilita serbisu iha pontu entrada ne’e.
Jornalista: Sérgio da Cruz
Editór: Cipriano Colo
makina X-Ray Gantry Smith Detection h Hand carry Smith Detection no Nuctech