Ministru Administrasaun Estatál (MAE), Miguel Pereira de Carvalho. Imajen/TATOLI

AILEU, 24 juñu 2021 (TATOLI)—Deputadu sira hosi Komisaun A ne’ebé trata asuntu Konstitusionál no Justisa, aprova ona proposta realizasaun resensiamentu dadus biométriku nune’e sei implementa hosi Sekretariadu Tékniku Administrasaun Eleitorál (STAE) iha 2022 tanba introdús ona iha lei resensiamentu eleitorál.

Notísia Relevante: Komisaun A altera lei resensiamentu eleitorál iha espesialidade

Ministru Administrasaun Estatál, Miguel Pereira de Carvalho, hateten alterasaun prinsipál ba lei resensiamentu eleitorál ne’e atubele rezolve problema téknika sira-ne’ebé STAE enfrenta relasaun ho baze dadus.

Tanba durante ne’e STAE iha baze dadus ne’ebé mak rejista sidadaun hotu-hotu depois prodús kartaun eleitorál no emite kartaun eleitorál.

“Lei vijente la espesífika ho detallada kona-ba informasaun sira-ne’e. Seluk tán mak ho resensiamentu eleitorál maka ami introdús resensiamentu biométrika hodi rejista informasaun biométriku ema-nian tantu matan, oin no liman nune’e sai informasaun atubele introdús iha baze dadus eleisaun nian. Planu resensiamentu biométriku ne’e sei hala’o iha tinan oin maibé ami hakarak introdús ona iha lei resensiamentu eleitorál,” Ministru Miguel Pereira de Carvalho informa ba Agência TATOLI, iha salaun Mukit, suku Aissirimou, munisípiu Aileu, kinta ne’e.

Tanba ne’e mak Governu liuhosi Ministériu Administrasaun Estatál propoin alterasaun dahuluk ba lei númeru 6/2016, 25 maiu, kona-ba lei resensiamentu eleitorál no kinta ne’e altera ona lei refere ho rezultadu votasaun a-favór 8.

Governante ne’e hatutan, alterasaun prinsipál ida tán mak bainhira STAE halo resensiamentu eleitorál nia hakarak rejista de’it sidadaun Timor-oan sira-ne’ebé mak iha ona identidade nasionál.

“Neste momentu partisipa iha resensiamentu presiza lori dokumentu lima mak hanesan pasaporte, Billete Identidade (BI), sertidaun RDTL, sertidaun batizmu nomós sédula komunidade Izlámika sira-nian. Maibé STAE hakarak hasai tiha balun no husik de’it mak rekizitu prinsipál sira hanesan pasaporte, kartaun eleitorál no sertidaun RDTL. Ne’e mak alterasaun prinsipál iha lei resensiamentu eleitorál ne’e,” nia dehan.

Entretantu tuir observasaun Agência TATOLI durante diskusaun ne’ebé espesífika ba resensiamentu biométrika ne’e introdús ona iha artigu 13 (Konteúdu Baze Dadus no Resensiamentu Eleitorál/BDRE no ficheiros eleitór sira) iha lei númeru 6/2016, 25 maiu, iha alíneia k define dadus seluk biométriku eleitór bainhira realiza resensiamentu biométriku.

Entretantu Ministru Administrasaun Estatal Miguel Pereira de Carvalho no Diretór Jerál STAE Acilino Manuel Branco, fó-sai ona katak resensiamentu biométrika ne’e sei hala’o iha 2022.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here