Ministru Petróleu no Minerál, Víctor da Conceição Soares. Imajen TATOLI/Egas Cristóvão

DILI, 24 juñu 2021 (TATOLI)-Ministériu Petróleu no Minerál (MPM) no Autoridade Nasionál Petróleu no Minerál (ANPM) finaliza ona avaliasaun téknika ambientál atu fó lisensa ambientál ba empreza Timor Resources Pty,Ltd hodi bele halo perfurasaun mina-matan iha Kosta Súl.

Ministru Petróleu no Minerál, Víctor da Conceição Soares, haktuir, iha semana kotuk nia parte hasoru ona ho Timor Resoruces ne’ebé parte empreza hato’o preokupasaun kona-ba seidauk iha lisensa ambientál tanba ekipamentu perfurasaun hahú halo ona mobilizasaun.

“Ita haree mina-matan iha área Suai hein hela lisensa ambientál, maibé ANPM kompromete ona katak iha loron 25 nia laran, iha inisíu fulan-jullu konklui ona atu ha’u aprova no emite ona lisensa ambientál ne’e atu hahú halo perfurasaun,” Ministru Víctór informa ba Agência TATOLI, iha ninia knaar fatin, Mandarin, kinta ne’e.

Daudaun ne’e, empreza australiana mobiliza ona mákina no hahú ona preparasaun atu halo instalasaun mákina perfurasaun dahuluk iha rai-maran.

Tuir ministru, ekipa alta autoridade avaliasaun impaktu ambientál ne’e kompostu hosi liña ministeriál hanesan, MPM, Ministériu Obra Públika (MOP), Ministériu Agrikultura no Peska (MAP), Ministériu Administrasaun Estatál (MAE), Sekretaria Estadu Ambiente (SEA).

“Ita haree envolvimentu liña ministeriál barak, tanba ne’e presiza duni tempu maibé sira kompromete iha inísiu fulan oin bele lori mai ha’u hodi asina atu atribui lisensa ambientál ba empreza austrálianu ne’e atu hahú perfurasaun,” nia akresenta.

Ministru dehan, mina-matan iha área Same iha problema oituan atu asesu estrada hodi mobiliza mákina sira ba área ne’e, maibé halo ona kooperasaun ho MOP liuhosi Insitutu Jestaun Ekipamentu, Institutu Públiku (IGE, I.P, sigla portugés).

“Ha’u negosia hela ho MOP atu hasoru malu ho Timor Resources hodi bele hadi’a dalan atu halo mobilizasaun mákina sira ho  di’ak ,” nia hatutan.

Tuir planu, Timor Resources sei halo perfurasaun ba posu dahuluk iha área Karaun iha Covalima no Manufahi iha inisiu jullu tinan ne’e,

Iha tinan 2017, hahú halo peskiza jeolójiku no estudu iha bloku lima no iha outubru 2018 sei realiza teste sízmiku iha bloku A, enkunatu iha bloku C iha zona Betano (entre Alas no Hatudu) ho teste vibroseis.

Nune’e, iha bloku A ne’ebé ida-idak hosi perfurasaun tolu iha shllow-field to’o metru 2.000 ho ninia kalkulasaun bele to’o millaun $35.

Enkuantu, bloku B haruka ona ba Timor Gás no Petróleu, Empreza Públika (Timor GAP, E.P) iha Onshore Block, ne’ebé hanesan subsidiáriu hosi parte Timor-Leste.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here