Komunidade simu Cesta Bázika. Imajen TATOLI/Dok

DILI, 24 juñu 2021 (TATOLI)- Programa distribuisaun Cesta Bázika iha Munisípiu Ainaro finaliza ona iha loron 05 juñu 2021, maibé abitante hamutuk 1.800 to’o oras ne’e seidauk simu sira-nia direitu Cesta Bázika.

Notísia Relevante : Ainaro Poténsia Zona Ortikultura

“Ko’alia kona-bá Cesta Bázika, ami finaliza iha loron 05 juñu 2021, no bainhira finaliza sira ne’ebé naran la sai mai reklama fali hamutuk 967 no sira ne’ebé seidauk simu Cesta Bázika ne’e 833, nune’e abitante 1.800 mak seidauk simu Cesta Bázika,”   responsavel Cesta Bázika Munisípiu Ainaro, Manuel Ramos Pinto, informa ba Agência Tatoli liuhosi telefónika, kinta ne’e.

Komunidade ne’ebé seidauk simu Cesta Bázika ne’e hosi Aldeia Mausuka, Suku Casa, Postu Administrativu Ainaro-Vila, Munisípiu Ainaro totál uma-kain 166 populasaun 883. Razaun komunidade hosi aldeia refere la simu Cesta Bázika tanba sira konsidera sasán nesesidade báziku ne’ebé kompañia lori ba  la tuir saida mak Governu promete ema ida hetan sasán ne’e tuir valor osan $50.00

“Ami ba hasoru ona sira, halo esplikasaun ba sira ne’ebé ami fó loron tolu ba sira ko’alia ho sira sei fó rezultadu fali ba ami sesta aban (25/06),”  Manuel Pinto Ramos haktuir.

Kona-bá reklamasaun, nia dehan, daudaun ne’e dadus haruka ona ba Governu Sentrál liuliu Ministériu Administrasaun Estatál, ne’ebé bainhira mak atu simu Cesta Bázika ne’e hein de’it rona informasaun hosi Governu.

Munisípiu Ainaro totál uma-kain 15.603, populasaun hamutuk 88.145, hosi númeru ne’e sira ne’ebé simu ona Cesta Bázika hamutuk 86.569, reklamante no seidauk simu Cesta Bázika hamutuk 1.800.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here