iklan

NASIONÁL, INTERNASIONÁL, HEADLINE, POLÍTIKA

Timor-Leste kontribui finanseiru $485.000 ba CPLP

Timor-Leste kontribui finanseiru $485.000 ba CPLP

Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (23/06). Imajen TATOLI/Egas Cristóvão

DILI, 23 juñu 2021 (TATOLI)–Governu liuhosi reuniaun Konsellu Ministru (KM) aprova Projetu Rezolusaun Governu, ba pagamentu antesipadu kontribuisaun finanseiru Timor-Leste nian ba Komunidade País sira Lian Portugués (CPLP, sigla portugés) ba tinan 2022 no 2023.

Projetu Rezolusaun ne’e aprezenta hosi Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno.

“Pagamentu antesipadu ne’e ho valór $485.000, ne’ebé Timor-Leste afirma filafali ninia empeñu ba organizasaun internasionál ne’e, ba ninia susesu no dezenvolvimentu,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha Palásiu Governu, kuarta ne’e.

Ho medida ida-ne’e, la’ós de’it atu garantia kondisaun ba Sekretariadu Ezekutivu, ne’ebé sei lidera hosi Timor-Leste atu hala’o ninia programa ba períodu tinan rua, maibé mós atu asegura katak Institutu Internasionál Lian Portugeza (IILP) iha meiu finanseiru nesesáriu ba ninia funsionamentu.

Nune’e mós, bazeia ba proposta hosi Ministra Negósiu Estranjeiru no Kooperasaun, KM aprova ona projetu deliberasaun kona-ba naran atu propoin ba Prezidente Repúblika, Francisco Guterres Lú Olo, atu lidera Misaun Permanente Repúblika Demókratika Timor-Leste nian iha CPLP.

Jornalista : Antónia Gusmão

Editora     : Julia Chatarina

iklan
iklan

Leave a Reply

iklan
error: Content is protected !!