Produtu Cesta Bázika iha bote-laran Imajen TATOLI/Antónia Gusmão

DILI, 23 juñu 2021 (TATOLI)—Sekretaria Estadu Kooperativa (SEKoop) finaliza distribuisaun Cesta Bázika iha munisípiu hitu hanesan Covalima, Liquiçá, Lautém, Ainaro, Aileu, Manufahi  no Manatuto.

“SEKoop finaliza ona distribuisaun iha loron 15 juñu liubá maibé sei falta aldeia ida iha Ainaro maka seidauk,” Diretór Jerál Kooperativa hosi SEKoop, Francisco Xavier, informa iha edifísiu SEKoop, Acait, kuarta ne’e.

Tuir Dirijente ne’e, iha problema oituan iha suku Kassa, maibé enkontru tékniku la’o ona atu finaliza iha suku ne’e tanba foin lalais iha intervensaun no komunidade la aseita atu simu Cesta Bázika.

“Foin lalais ita-nia tékniku sira halo ona enkontru ho autoridade lokál no sei informa ba komunidade, sira prontu simu, entaun semana ida-ne’e bele kompleta ona ba 100%,” nia akresenta.

Hafoin rona informasaun hosi parte hotu, komunidade iha suku Kassa, Ainaro konkorda simu Cesta Bázika.

Iha sorin seluk, SEKoop  no Ministériu Finansa (MF) halo ona pagamentu 50% ba kompañia fornesidór Cesta Bázika ne’ebé distribui ba populasaun iha munisípiu hitu.

“Pagamentu Cesta Bázika ba faze dahuluk ita halo ona, ne’ebé kompañia sira simu metade 50% no agora ne’e sira simu kompletu, kuaze kompañia lubuk ida mak seidauk hetan pagamentu finál,” nia hatutan.

Pagamentu ba faze daruak, daudaun ne’e MF hahú loke fali ona sistema atendimentu halo pagamentu, tanba ne’e SEKoop mós komesa halo prosesu aprovizionamentu ba kompañia sira, molok submete ba Sekretariadu Téknika hodi halo pagamentu.

“Prosesu ne’e atu la’o no iha tempu badak kuandu dokumentu ne’e kompletu ona, manda ba Ministériu Finansa atubele  halo pagamentu,” nia esklarese.

Tanbe ne’e, SEKoop hein hela kompañia fornesedór distribuisaun ai-han remata ona atubele submete ona sira-nia dokumentu ka relatóriu hodi nune’e bele enkamiña ba MF.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here