FOKUPERS halo konférensia imprensa, kuarta (23/06/2021). Imajen Tatoli/Arminda Fonseca

DILI, 23 juñu 2021 (TATOLI)- Forum Komunikasi Perempuan (FOKUPERS) Timor-Leste husu ba Prezidente Repúblika (PR), Francisco Guterres “Lú-Olo” atu halo avaliasaun ba ekipa Ministériu Negósiu Estranjeiru no Kooperasaun (MNEK) ne’ebé fó votu abstensaun ba rezolusaun Organizasaun Nasoins Unida (ONU-sigla inglés) nian kona-ba mediasaun prevensaun konflitu iha Myanmar.

Notísia Relevante : PM Taur tenke investiga ekipa vota abstensaun ba situasaun Myanmar

“Ami husu Prezidente Repúblika halo avaliasaun ba ekipa MNEK ne’ebé hasai deklarasaun liuhosi komunikadu imprensa katak fó votu abstensaun ba rezolusaun ONU kona-ba medida prevensaun konflitu iha Myanmar, ida ne’e hatudu katak sira foti desizaun nivel altu internasionál laiha koordenasaun, komunikasaun no konsulta ba ierarkia iha nasaun ida-ne’e, inklui sosiedade sivíl,” koordenadora Konsensializasaun no Advokasia FOKUPERS, Natalia de Jesus Cesaltino, hateten liuhosi  konferénsia imprensa ne’ebé hala’o iha salaun FOKUPERS, Faról, Dili kuarta ne’e.

Nia dehan, loloos MNEK labele lori Timor-Leste nia naran fó votu abstensaun ba situasaun Myanmar tanba situasaun ne’ebé daudaun ne’e akontese iha Myanmar hanesan loos Timor-Leste nia situasaun iha tempu pasadu ne’ebé momentu ne’ebá Timor-Leste simu tulun no apoiu solidariedade oin-oin hosi belun, hanesan, ativista sira hosi nasaun barak ne’ebé mai ho sira ida-idak nia mekanizmu no estratéjia hodi luta kontra violasaun direitu umanu no direitu feto iha okupasaun Indonézia durante rejime Soeharto  nian.

“Hanesan organizasaun direitu umanu ne’ebé foka ba direitu feto iha okupasaun militár Indonézia, FOKUPERS labele nega katak ita sai forte liu iha momentu ne’ebá tanba ho suporta no apoiu sira hosi mundu internasionál tantu hosi ativista, media, igreja no mós ONU,” nia hateten.

Nia hateten, liuhosi votu abstensaun ne’ebé MNEK fó ba situasaun Myanmar ida ne’e sei fó impaktu ba  Timor-Leste nia diplomasia no parseria bilateral iha futuru liga ho Timor-Leste nia prosesu adezaun ba ASEAN no kestaun seluk tan iha rejiaun.

“Governu TL liuhosi MNEK rasik mak trai ita nia Konstituisaun Repúblika, artigu 8- relasaun internasionál pontu rua (2) no haat (4), artigu 9 simu direitu internasionál, pontu 1, 2 no 3), artigu 10- Solidariedade pontu 1. Nune’e mós trai ba Estadu Timor-Leste nia kompromisu ba tratadu internasionál sira ne’ebé TL ratifika ona,” nia hateten.

 Ho votu ne’ebé MNEK fó ba situasaun Myanmar nian, ida ne’e FOKUPERS lamenta tebes no afirma katak votu ne’e la reprezenta povu Timor-Leste nia vontade no desizaun ba apoiu solidáriu povu Myanmar.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here