Prezidente Komisaun D Ekonomia no Dezemvolvimentu, Deputadu Antoninho Bianco. Imajen TATOLI/Egas Cristóvão

DILI, 23 juñu 2021 (TATOLI)—Komisaun D Parlamentu Nasionál (PN) ne’ebé trata asuntu Ekonomia no Dezenvolvimentu, halo vizita traballu ba edifísiu Sekretaria Estadu Kooperativa (SEKoop) iha Akait.

Prezidente Komisaun D, Antoninho Biaco, hateten, vizita  traballu ne’e ho objetivu atu haree  besik kondisaun servisu instituisaun Estadu ne’e no preokupa ho edifísiu ne’ebé la permanente.

Ami haree edifísiu ne’ebé sira haknaar-an ba, daudaun sira-nia fatin seidauk loos,  fatin ida-ne’e hanesan provizóriu no funsionáriu SEKoop balun halo serbisu iha fatin seluk,” Prezidente Komisaun informa hafoin ramata vizita edifísiu SEKoop, kuarta ne’e.

Komisaun D sei esfosu ko’alia ho parte ministériu kompetente hodi bele oferese rai ba SEKoop  atu halo edifísiu foun.

“Ba oin, karik laiha fatin atu harii edifísiu, ami tenke ko’alia ho membru Governu ne’ebé trata asuntu rai hanesan Ministériu Justisa, Diresaun Nasionál Terra no Propriadade, atubele tenta buka fatin ne’ebé bele instala edifísiu atu asegura sustentabilidade serbisu iha kooperativa,” nia akresenta.

Deputadu Bankada FRETILIN ne’e promete, nia parte sei levanta problema ne’e ba plenária hodi Governu buka solusaun, nune’e bainhira iha komisaun revizaun orsamentu, Komisaun D sei rekomenda Governu tau konsiderasaun ba kestaun ne’e.

Iha vizita traballu ne’e, Komisaun D rona mós progresu servisu ne’ebé durante ne’e SEKoop iha, liu-liu impletasaun kooperativa ne’ebé tuir planu munisípiu ida kooperativa rua, ne’ebé sei prepara lei kooperativa sira ne’ebé instituisaun ne’e iha.

Iha fatin hanesan, Sekretáriu Estadu Kooperativa, Elizário Ferreira, hateten, vizia traballu hosi Komisaun hanesan vizita ida atu motiva SEKoop, hahú hosi nível líder to’o funsionáriu atubele funsiona di’ak liután liga ba serbisu.

“Ami kontente ho presenza iha ami-nia fatin hodi halo diskusaun no avaliasaun hodi haree hamutuk dezafiu progresu atividade hosi jeneiru to’o juñu,” nia hatutan.

Iha tinan-ida parte SEKoop iha projeitu lei ida hanesan lei komplementár haat ne’ebé maka tama iha ajenda Sekretaria Estadu ne’e.

“Husu atubele akompaña lei ne’e ba Parlamentu, karik Deputadu Komisaun D sira bele sai hanesan autór ne’ebé maka bele ajuda aprova lei ne’e,” nia reforsa.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here