iklan

NASIONÁL, DILI, HEADLINE

Família 22.220 iha territóriu tomak simu ona apoiu umanitáriu

Família 22.220 iha territóriu tomak simu ona apoiu umanitáriu

Kondisaun uma iha área Ponte Comoro 3, Dili, ne’ebé hetan estragu hosi inundasaun ne’ebé akontese domingu (04/04/2021). Imajen TATOLI/António Gonçalves.

DILI, 23 juñu 2021 (TATOLI)—Sekretáriu Estadu Protesaun Sivíl (SEPS), oferese ona apoiu umanitáriu ba família 22.220 iha territóriu ne’ebé afetadu ba dezastre naturál, iha 04 abríl.

“Dadus família afetadu hamutuk 30.102  ne’ebé  ita fó ona apoiu umanitáriu hanesan food item no non food item  ba 22.220. Família 7.900  iha Dili sei iha hela prosesu distribuisaun,” SEPS, Joaquim Gusmão hateten ba jornalista-sira iha edifísiu Ministériu Interiór, kuarta ne’e.

Notísia relevante:SEPS distribui ona materiál konstrusaun ba família 1.083 iha Dili

SEPS mós hato’o ona pedidu ba Ministériu Finansa (MF), liuhosi fundu kontizénsia ne’ebé prosesu akizasaun la’o hela, atu bele distribui ba família ne’ebé seida’uk hetan apoiu.

Dadus verifikasaun ne’ebé SEPS iha, família 4.162 mak presiza hetan apoiu rekoperasaun, maioria hosi Dili ne’ebé daudaun distribuisaun materiál konstrusaun la’o hela iha Dili no munisípiu-sira hanesan  Liquiça, Ermera no Manufahi.

Joaquim Gusmão la esplika detallu kona-bá kategoria estragu kamán, natón no aat totál, maibé hosi dadus ne’e família afetadu maioria hosi Dili.

Dadus hosi Diresaun Nasionál Dezastre, ne’ebé antes ne’e fó-sai katak, to’o 16 fulan juñu oferese ona materiál konstrusaun ba família 1.083 iha Dili.

Númeru afetadu ne’e ho nia deskrisaun, postu administrativu Na’in-Feto iha família afetadu 323 ho tipu uma estragu totál 44, aat natón 131, aat kamán 148 ne’ebé simu ona apoiu hamutuk 21 no 302 seida’uk simu.

Postu administrativu Dom Aleixo iha família afetadu 1.799 ho tipu uma estragu totál 743, aat natón 569, aat kamán 486 no simu ona apoiu 788 no seida’uk simu 1.011.

Postu administrativu Crito Rei iha família afetadu 662 ho tipu estragu totál 232, aat natón 260, aat kamán 169, simu ona apoiu 37 no seida’uk simu 625.

Postu administrativu Vera Cruz iha família afetadu 416 ho tipu uma estragu tot’al 48, aat natón 165, aat kamán 203 no simu ona apoiu 221 no seida’uk simu hamutuk 195.

Postu administrativu Metinaro iha família afetadu 128 ho tipu uma estragu totál 25, aat natón 13, aat kamán 90, númeru ne’e seida’uk simu apoiu.

Postu administrativu Ataúro iha família afetadu 16 ho tipu uma estragu totál rua, aat natón haat, aat kamán 10, simu hotu ona apoiu.

Pakote materiál konstrusaun ba kada vitima ne’ebé uma hetan estragu totál simu kalén-uma 0.30m tahan 50, pregu kalén 2kg, pregu 12cm 2kg, pregu 10cm 2kg, pregu 7 cm 4kg, besi-beton 10mm 12 barra, besi betón 8mm 10 barra, arame finu rolu rua ho semente tonasa 40kg saka 25, no mós osan mão de obra $356 hodi selu bada’en.

Sira ne’ebé kategoria aat natón sei simu kalén ho pregu no osan $356, aat kamán sei simu kalén ho pregu kalén no osan $150.

Pakote materiál konstrusaun ba kada vítima ne’ebé uma hetan estragu totál simu kalén-uma 0.30m tahan 50, pregu-kalén 2kg, pregu 12cm 2kg, pregu 10cm 2kg, pregu 7cm 4kg, besi-betón 10mm 12 barra, besi-betón 8mm 10 barra, arame finu rolu rua ho semente tonasa 40kg saka 25, no mós osan mao de obra $356 hodi selu bada’en.

Sira ne’ebé kategoria aat natón sei simu kalén ho pregu no osan $356, aat kamán sei simu kalén ho pregu kalén no osan $150.

Jornalista: Nelson de Sousa

Editór: Cipriano Colo

iklan
iklan

Leave a Reply

iklan
error: Content is protected !!