TDD. Imajen Tatoli /Dok

DILI, 22 juñu 2021 (TATOLI)—Tribunál Distritál Dili (TDD), kontinua rona sasin ka testamuña ba kazu administrasaun danoza ho pekulatu, ne’ebe deskonfia komete hosi arguidu na’in-tolu ho inisiál AS, DFBP, IBPA hosi Ministériu Edukasaun Joventude no Desportu (MEJD).

Sasin ho inisiál MS nu’udár kondutór ba iha arguidu AS iha momentu ne’ebá bainhira hala’o dezlokasaun ba munisípiu sira, ligadu ho serbisu projetu karta edukativa ba munisípiu Manatuto, Liquiça, Oe-cusse no Ermera.

Notísia relevante:Tribunál Kontinua Julga Kazu Administrasaun Danoza no Pekulatu iha ME

MS dehan, sira-nia parte ba iha Liquiça no Ermera no fila kedan, maibé bainhira ba iha Manatuto toba kalan rua ka tolu, no ba iha Oe-cuse seida’uk to’o semana karreta aat, nune’e arguidu lori fila tiha karreta ba hadi’a.

Iha sala audiénsia ne’e, MS dehan sira-nia parte ba munisípiu ne’e kada loron ema ida simu perdiem $40 no arguido-sira loron ida bele hetan perdiem $60.

“Kona-bá viajen ba Aileu, tempu ne’ebá ha’u moras. Nune’e, kondutór seluk mak substitui,” sasin MS hateten iha sala audiénsia TDD, tersa ne’e.

Rona tiha deklarasaun ne’e, Tribunal deside adi’a fila-fali julgamentu ne’e ba 29 juñu tinan ne’e, hodi rona sasin seluk.

Tuir depoimentu Ministériu Públiku (MP), katak, iha 08 abríl 2014, arguidu AS submete proposta ida ba Diretór Jerál Serbisu Kooperativa, hodi husu orsamentu atu realiza atividade iha munisípiu hotu ho montante $16.880.

Maibé, orsamentu viajen ne’ebé arguidu AS apropria ba interese pesoál ho montante $540 tanba arguidu rasik la halo viajen ba munisípiu-sira hanesan Liquiça iha 01/08/2014, no arguidu AS simu tiha osan viajen hamutuk $180.

Ba munisipiu Aileu, 01/06/2014, arguidu AS mós simu osan ho montante $ 120, munisípiu Ermera, iha 11/12/2014, arguidu AS simu osan montante $60, maibe arguidu la halo viajen ba munisipiu sira ne’e no arguidu hala’o viajen ba Oe-cusse loron ualu de’it, tuir loloos simu osan viajen montante $440, maibé arguidu AS inventa tiha viajen ba loron 10 hodi hetan tan osan ho montante $120.

Audiénsia julgamentu ne’e, prezide hosi juiz koletivu José Gonçalves, Argentino Nunes, Alvaro Freitas, Ministériu Públiku reprezenta hosi prokuradór, Matias soares, no arguidu sira hetan asisténsia legál hosi advogadu privadu no defensór públiku.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here