PNTL kontinua halo pasa revista ba motorista ne’ebé hala’o movimentu iha kapital Dili laiha karta kondusaun no dokumentu seluk, kuarta, (02/06/21).Imajen Tatoli/António Gonçalves.

DILI, 22 juñu 2021 (TATOLI)—Polísia Nasionál Timor Leste (PNTL) liu hosi Komandu Munisípiu Dili ho Diresaun Nasionál Tránzitu no Seguransa Rodoviária (DNTSR), iha segunda (21/06) kalan, kontinua halo apreensaun ba motorizada ne’ebé la uza xapa matríkula iha Dili.

Komandante Polísia DNTSR, Superintendente Polísia, João dos Reis Belo, hateten transporte sira ne’ebé la uza xapa matríkula oin ho kotuk halo movimentu iha kalan, viola lei kódigu estrada.

Notísia relevante:PNTL halo apreensaun ba motór 60 no karreta haat

“Ita fó nafatin toleránsia ba motorista-sira ne’ebé dokumentu inválidu durante tempu Estadu emerjénsia. Maibé, ohin kalan ne’e maioria laiha asesores hanesan xapa matríkula, espellu no lampu la iha ita foti medida ba sira. Tanba ne’e, se mak kontra kódigu estrada, konsidera infrasaun no tenke kumpri hodi kompleta prosesu administrasaun atu selu iha BNCTL,” João Belo hateten ba jornalista-sira iha Palásiu Governu, tersa ne’e.

Nia dehan, objetivu hosi operasaun rutina  ba transporte sira iha kalan atu kontrola jestaun veíkulu hodi kria ambiente kondusaun seguru ba motorista-sira.

Alende ne’e, operasaun ne’e sei kontinua nafatin hodi dezenvolve kampaña seguransa rodoviária, inklui eduka sidadaun-sira hodi respeita lei tránzitu, tanba ne’e husu atu motorista-sira tenke kompleta rekezitu hanesan lori dokumentu própriu no monta asesores transporte.

Motorizada kuaze 20-resin ne’ebé PNTL konsege halo apreensaun iha operasaun ne’e no lori kedan ba edifísiu Komandu PNTL, Caicoli, Dili.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here