Country Diretora Plan Internasionál, Diliyana Ximenes, entrega materiál dezinfetante ba MEJD, tersa (22/06/2021). Imajen Tatoli/Tomé Amado

DILI, 22 juñu 2021 (TATOLI) – Plan Internasionál nu’udar parseiru dezenvolvimentu no estratéjiku ba Estadu Timor-Leste, tersa ne’e, iha salaun enkontru Ministériu Edukasaun, Juventude no Desportu (MEJD), Dili,  apoiu materiál dezinfetante ba eskola 195 iha Munisípiu Aileu ho Ainaro.

Notísia Relevante : Plan internasionál fó apoiu emerjénsia ba vítima dezastre naturál

Country Diretora Plan Internasionál, Diliyana Ximenes, klarifika katak, dezinfetante ne’e sei fahe ba eskola sira iha Aileu hamutuk 98 no iha Ainaro hamutuk eskola 97.

Material dezinfetante ne’ebé distribui ne’e, hanesan sabaun, bycleane, viksal no seluk tan. La’ós ne’e de’it, Plan Internasionál mós oferese pregu atu bele ajuda hadi’a eskola balun ne’ebé hetan estragu iha dezastre naturál, 04 abríl liubá.

Plan Internasionál kontinua hatudu nia prontidaun no kompromisu hodi apoiu Governu no Ministériu Edukasaun iha situasaun saida de’it.

Materiál dezinfetante inklui materiál konstrusaun báziku ne’ebé Plan oferese ba MEJD ne’e gastu ho orsamentu ki’ik purvolta $8.300 mai duni hosi fundus Plan nian rasik.

Ministru Edukasaun Juventude no Desportu (MEJD), Armindo Maia, ne’ebé hola parte iha serimónia entrega apoiu material dezinfetante ne’e hateten, Plan Internasionál fó apoiu sira-ne’e tanba iha kooperasaun mútua hodi tau matan ba komunidade edukasaun.

Oferta hosi Plan Internasionál ne’e nu’udar manifestasaun ka espresaun ida kona-ba servisu hamutuk no kooperasaun di’ak nu’udar dalan ida hodi haforsa nafatin kooperasaun entre MEJD ho ajénsia internasionál sira seluk.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here