Diretór Agró- Komérsiu no Kooperasaun Setór Privadu, hosi MAP, Fernando Egidio Amaral. Imajen/Natalino Costa

DILI, 22 juñu 2021 (TATOLI)–Diretór Nasionál Agro-Komérsiu no Kooperasaun Setór Privadu hosi Ministériu Agrikultura no Peska (MAP), Fernando Egidio Amaral, hateten, parte ministériu hahú hatún presu foos-rai iha Loja Agrikultór iha Fatuhada no Timor Plaza, Dili.

“Ita hahú rekupera filafali foos iha Loja Agrikultór, foos ne’ebé ho presu $15, ita hatún ba $12,50, nune’e bele normaliza di’ak liután foos nia presu,” Diretór informa iha ninia knaar fatin, edifísiu MAP, Comoro, tersa ne’e.

Daudaun ne’e Loja Agrikultór iha ona foos-rai, modo, tomate no produtu agríkola seluk tan hosi munisípiu.

“Ita sei halo normalizasaun ba produtu sira seluk liuhosi ami-nia kordenasaun serbisu ho grupu agrikultór sira, ne’ebé sira prontu atu hatama nafatin produtu ba loja,” nia akresenta.

MAP hamutuk ho parseiru, lansa Loja Agrikultór iha loron 06 juñu 2019, ho hanoin ida atu halo konesaun entre agrikultór no merkadu, tanba maioria povu Timór envolve-an iha atividade agrikultura, maibé iha dezafíu atu hetan oportunidade asesu merkadu atubele fa’an produtu.

Tanba ne’e estabelese Loja Agrikultór, ne’ebé fa’an produtu agríkola hosi asosiasaun agrikultór iha munisípiu 12 hanesan foos lokál (foos mutin, mean no metan), modo, ai-fuan fresku, fore, kafé no seluk tan.

Jornalista : Natalino Costa

Editora      : Julia Chatarina

HAKEREK NO HATÁN

Please enter your comment!
Please enter your name here