Hare iha Atabae. Imajen TATOLI/António Gonçalves

DILI, 22 juñu 2021 (TATOLI)–Diretora Jerál Ministériu Agrikultura no Peska (MAP), Odete  Maria do Ceu Guterres, informa, mákina ko’a hare lima ne’ebé antes hetan doasaun hosi Xina sei funsiona ho di’ak no ajuda tebes agrikultór sira.

“Mákina ko’a hare ne’ebé maka uluk ita hetan doasaun hosi Xina iha lima no ita aloka ba fatin irrigasaun boot lima,” Diretora hateten ba Agência TATOLI, iha ninia knaar fatin, edifísiu MAP Comoro, tersa ne’e.

Nia dehan, mákina ne’e funsaun ko’a no baku hare, hafoin dulas sai ba foos-rai kedan.

“Ita halo distribuisaun ba ita-nia tékniku sira no hetan treinamentu hosi pesoál ne’ebé mai hosi Xina altura ne’ebá ho durasaun fulan-ida iha Manatuto, kona-ba oinsá halo manutensaun kiik no operasionaliza ekipamentu boot sira hanesan ne’e,” nia akresenta.

Tuir Diretora, mákina ne’e labele tama natar hanesan iha Maliana I no II tanba natar kiik.

“Ami husu agrikultór sira loke dalan maibé sira lakohi, ida-ne’e maka sai dezafiu maibé ita bele rezolve,” nia hatutan.

Mákina ko’a hare fahe ba irrigasaun boot iha Maliana I no II, ida iha Kasa Ainaro, Viqueque, no Baucau.

Jornalista : Natalino Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here