Sala-de-aula iha Mahon Training Center. Imajen Tatoli/Nelia Fernandes.

DILI22 juñu 2021 (TATOLI)—Mahon Training Center sei fó sai avizu hodi reativa formasaun ba formandu 132 iha fulan-jullu nia hahú.  

Notísia Relevante: Governu Japaun apoia $99.825 ba Fundasaun Mahon konstrui EBF iha Bobonaro

“Iha semana ne’e nia laran ita sei fó sai avizu ba formandu sira-ne’ebé agora dada’uk deskansa hela iha uma tanba serka sanitária, nune’e sira bele fila-fali mai tuir formasaun iha fulan-jullu nia hahú iha aula prejensiál,” José de Jesus hateten ba Agênsia Tatoli, iha nia servisu fatin, Bairru Pite, Díli, tersa ne’e.

Avizu ne’e sei fó sai liuhosi Mahon Training Senter nia pájina facebook, tanbá kada formandu ne’ebé mai rejistu iha sentru ne’e iha obrigasaun tenke asessu ba pájina facebook refere.

Formandu hirak ne’e, tuir ona aula iha fulan ida-resin nia laran maibé tanba iha marsu (2021) ne’e Governu implementa serka sanitária no konfinamentu obrigatóriu, entaun provizoriamente formasaun ne’e suspende to’o ohin loron.  

“Iha ne’e, ami loke formasaun iha área lian Inglés, komputador, jestaun administrasaun no finansa nian,” nia informa.

Mahon Training Center hahú halo servisu voluntáriu iha 2016, hafoin ne’e harii nu’udar sentru formasaun iha 2017 to’o ohin loron. Inisiativa harii sentru ne’e atu dezenvolve juventude sira-nia abilidade nomós fó espasu aprendizajen ba joven sira-ne’ebé ramata ona eskola sekundáriu maibé laiha kbi’it atu kontinua iha nível universidade.

Fundadór no Prezidente Fundasaun Mahon, José de Jesus. Imajen Tatoli/Nelia Fernandes.

“Iha formandu balun hasai ona lisensiatura, maibé tanbá sira defisil atu hetan servisu entaun sira mai tuir formasaun para bele hetan esperiênsia ruma. Sira tuir estájiu iha instituisaun públiku hanesan iha ministériu sira atu sira bele manan esperiénsia ruma, depois bele aplika ba oportunidade servisu iha setór privadu, públiku, no Organizasaun Sosiedade Sivil sira,” nia dehan.

Objetivu hosi harii sentru ne’e, atu fó espasu aprendizajen liuhosi edukasaun nonformál ba joven sira, nune’e sira bele hetan netik oportunidade aprendizajen, depois bele kontinua sira-nia kareira hanesan joven ida-ne’ebé bele hamosu ideia kreativu atu bele aplika ba iha kualker servisu ne’ebé sira prefere.

Iha tinan 2017 ne’e formasaun hahú ho lian Inglés, Portugês, Komputadór, Jestaun Administrasaun no Finansa, maibe iha 2018-2019 aumenta tan área Informátika Teknólojia (IT) no área agrikultura no kuda ai oan.

Tuir planu, Mahon Training Center sei loke tan área turizmu no jestaun hotelaria ne’ebé sei realiza iha tinan 2022. Sira sei fó formasaun ba joven sira iha munisípiu liuhosi programa apoiu hosi doadór sira iha área jestaun negósiu no programa agrikultura.

“Ida-ne’e, atu forma joven sira-ne’ebé hela iha munisípiu sira, bele hametin tan sira-nia abilidade servisu iha área agrikultura,” nia dehan.

Formandu sira-ne’ebé termina ona sira-nia formasaun iha Mahon Training Center, hahú hosi tinan 2017 to’o agora hamutuk 3000-resin. Mahon Training Center identifika, graduadu 50% mak hetan ona servisu iha instituisaun Estadu, ONG no empreza lokál balun.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here