Espoza Prezidente Republika, Cidalia Nobre Lopez Mozinho Guterres. Imajen/Antonio Goncalves.

DILI, 22 juñu 2021 (TATOLI)—Espoza Prezidente Repúblika, Cidália Nobre Lopes Mouzinho Guterres, enkoraja estrutura Crus Vermelha Timor-Leste (CVTL) atu halo servisu hodi atende komunidade ne’ebé presiza tulun ho di’ak liután.

Notísia Relevante: MS-CVTL konstrui fasilidade saneamentu ba vítima inundasaun iha Masin Lidun

“Ha’u fiar no fó ha’u-nia konfiansa ba estrutura CVTL nian liu-liu ba joven voluntáriu sira atu halo servisu di’ak liu, nune’e bele fó apoiu ba komunidade sira-nia sofrimentu ho di’ak liután,” Espoza PR hateten ba jornalista sira, bainhira partisipa iha aniversáriu CVTL nian ba dala-XXI ho tema “Hmutuk CVTL Hakmaan  Sofrimentu Umanu”, iha Bairru Formosa, Dili, tersa ne’e.

Iha biban ne’e, spoza PR hato’o agradese ba ekipa CVTL tanba tulun komunidade afetadu sira liu-liu labarik feto no inan isin-rua sira iha serka sanitária no dezastre naturál ne’ebé akontese iha 04 abríl.

“Ho okaziaun ida-ne’e ha’u hakarak agradese ba fundadór sira ne’ebé hari’i CVTL hodi hakman sofrementu komunidade nian liu-liu asaun umanitáriu ba ita-nia komunidade. CVTL nia atendementu ne’ebé lais liu iha oras tolu nia-laran hodi bele atende komunidade ne’ebé afeta ba dezastre naturál iha fulan abríl liubá,” nia dehan.

Krús Vermella Timor-Leste (CVTL, sigla potugés) nu’udar organizasaun umanitária ne’e, harii hosi timor-oan na’in-16 iha loron 22 juñu 2020, ne’ebé Governu Timor-Leste rekuñese iha 14 setembru 2005 liuhosi dekretu-lei nú. 6/2005.

Iha tempu portugés, filiál Kruz Vermella Portugál eziste to’o 1975 no iha périodu indonézia nian, sai nu’udar filiál ida hosi Palang Merah Indonésia (PMI) to’o 1999.

CVTL nia vizaun mak atu salva vida no hadi’a kualidade moris hosi ema mukit sira no misaun mak mobiliza no enkoraja foin-sa’e, voluntáriu no komunidade hodi promove atividade umanitária sira liuhosi organizasaun ne’ebé forte  no sustentavel iha territóriu Timor-Leste.

Notísia Relevante: CVTL akumula família 84, maioria bebé no inan isin rua

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here