Edifísiu CAC. Imajen/Média CAC.

DILI, 22 juñu 2021 (TATOLI)—Tuir dadus hosi Komisaun Anti Korrupsaun (CAC sígla portugés), iha benefisiáriu la elizível, hamutuk na’in 73 mak devolve ona subsídiu $200.

Komunikadu hosi CAC hateten, Diresaun Jerál Ministériu Solidaridade Sosiál no Inkluzaun (MSSI) hamutuk CAC-rasik halo ona deklarasaun ba públiku atu husu kolaborasaun no konsiénsia hosi benefisiáriu-sira ne’ebé serbisu iha instituisaun públiku no privada-sira, emprezáriu ka benefisiáriu-sira seluk hosi eskema espesiál, ho valór liu $500, atu redepozita ka devolve ba kofre Estadu liu husi mekanizmu ne’ebé estabelese hosi MSSI-BNCTL.

Notísia relevante:Mekanizmu devolve subsídiu $200, CAC-MSSI koordena ona ho BNCTL

Avaliasaun konjunta iha 17 juñu entre CAC, MSSI no BNCTL ho objetivu atu haree progresu-sira kona-bá prosesu ne’e.

“Durante avaliasaun hatudu katak, iha ona benefisiáriu hamutuk ema na’in 73 mak redepozitu ona osan ne’e ba kofre Estadu liu hosi BNCTL, tantu iha Dili no sukursál iha munisípiu-sira,” komunikadu ne’e haktuir.

CAC apresia ho benefisiáriu-sira ne’ebé hatudu responsabilidade no sentidu pertense ba Estadu Repúblika Demokrátika Timor-Leste (RDTL).

“Ami fiar katak númeru ne’e seida’uk reprezenta númeru benefisiáriu loloos ne’ebé asesu ba subsídiu ne’e. Tanba ne’e, dala ida tan apela ba sira ne’ebé seidauk redepozita atu halo esforsu hodi redepozita ho prazu ikus maka 30 juñu,” CAC fó-hanoin.

Ba interese ida-ne’e, benefisiáriu-sira iha Dili bele ba redepozita iha BNCTL Timor-Plaza ne’ebé disponível atu presta atendementu ketak  ba prosesu ne’e. Enkuantu iha munisípiu-sira, benefisáriu-sira bele ba redepozita iha sukursál BNCTL iha munisípiu ida-idak.

Atualmente CAC serbisu hamutuk ho MSSI, Institutu Nasionál Seguransa Sosiál (INSS), atu rekolla hotu informasaun no kruza dadus pesoál funsonáriu-sira no serbisu setór públiku no privada-sira ne’ebé asesu ba subsídiu ne’e, bainhira prazu ne’ebé determinadu mak seidauk redepozita, sei prosesa tuir lei.

Tuir artigu 2  Dekretu Lei númeru 15/2020 kona-bá benefisiáriu hosi apoiu monetáriu ba agregadu familiár iha ámbitu pandemia COVID-19, define katak, ‘la sujeita ba benifísiu hosi apoiu monetáriu ‘Uma-kain’ ba sira ne’ebé membru familiár ida hetan rendimentu regulár kada fulan iha instituisaun públika no privada-sira, emprezáriu ka benefísiu sosiál-sira seluk hosi eskema espesiál, ho valór liuhosi $500.

Iha agustu 2020, CAC aprezenta ona relatóriu deskobrimentu kona-bá implementasaun fundu agregadu familiár iha ámbitu prevensaun COVID-19.

Relatóriu ne’ebé prodús ho kolaborasaun CAC, PDHJ, Komisaun Funsaun Públiku, Inspetór Jerál Estadu, organizasaun sosiedade sivíl no estudante-sira, deskobre katak, iha irregularidade lubuk ida tanba konfuzaun oioin kona-bá interpretasaun ida-ne’ebé loloos ba provizaun relevante ba se loos mak benefisiáriu-sira, no problema sériu kona-bá verifikasaun baze dadus ba benefisáriu-sira.

Tanba ne’e, iha intervensaun-sira durante inspesaun no monitorizasaun ne’e, ekipa CAC konsege trava imediatamente benefisiáru ne’ebé la sujeita ba direitu atu asesu ba subsídiu ne’e hamutuk 1.927 ne’ebé ekivalente ho valór $385.400.

Jornalista: Nelson de Sousa

Editór: Cipriano Colo

1 KOMENTÁRIU

  1. Sujere karik benefisiariu nia rendimentu fulan liu 500.00, no sira ne’ebe seidauk devolve osan presija mos hasai lista naran sira ne’e para idak2 hatene no ba selu. RAZAUN tamba:
    1.Ita boot sira mak fo sai benefisiariu naran pois laiha esplikasaun klaru ba populasaun.
    2. ita boot sira asesu ba base dados Seguranca Sosial, HALO NUSA mak rendimentu liu 500 mos naran sai fali iha lista.
    Abraco forte, bom trabalho

Leave a Reply to lilly Branca Cancel reply

Please enter your comment!
Please enter your name here