Prezidente Institutu Politékniku Betano (IPB), Acácio Cardoso Amaral. Imajen Tatoli/Egas Cristovão

DILI, 22 juñu 2021 (TATOLI) – Institutu Politéknika Betano (IPB) liuhosi Konsellu Jerál IPB no estrutura tomak, segunda (21/06), iha auditóriu Fakuldade Engeñaria, Siénsia no Teknolojia Hera-Dili, realiza kongresu hodi hili prezidente IPB períodu 2021-2025.

Notísia Relevante : Konstrusaun edifísiu foun IPB sei gasta millaun $18-resin

Iha prosesu votasaun ka eleisaun tenke halo dala-rua tanba iha eleisaun  dahuluk, votasaun hosi kompozisaun Konsellu Jerál IPB nian hamutuk na’in-12 ne’ebé hili kandidatu dahuluk Acácio Cardoso Amaral, hetan totál votu-neen (6) no kandidatu daruak Claudio Filipe Ximenes, mós hetan totál votu-neen (6).

Parte Konsellu Jerál IPB ne’ebé lidera hosi prezidente Konsellu Jerál IPB, Rui Daniel de Carvalho, deside hodi halo votasaun ba daruak nian, ho nia rezultadu Acácio Cardoso Amaral, ho votu-sia (9) no kandidatu daruak Filipe Ximenes, ho votu-tolu (3). Nune’e, Acácio  Cardoso Amaral, eleitu hanesan prezidente IPB ba períodu 2021-2025.

Prezidente Konsellu Jerál IPB, Rui Daniel de Carvalho, deklara katak eleisaun prezidente IPB nian, hanesan faze dahuluk hodi realiza eleisaun Prezidente IPB ba tinan ida ne’e, nafatin tau konfiansa ba malu, liuliu hirak ne’ebé kompete ona atu tulun malu nafatin hodi kontribui ba dezenvolvimentu ba institutu ida-ne’e di’ak ba futuru.

Liuhosi publikasaun ofisial pájina Facebook Instituto Politécnico Betano – IPB nian, segunda (21/06), relata katak iha sesaun importante ba istória IPB nian ne’e, Ministru Ensinu Superiór Siénsia no Kultura (MESSK), Longuinhos dos Santos, kongratula  prezidente eleitu foun hodi lidera IPB no husu nafatin prezidente foun presiza hadi’a kualidade formasaun, nune’e bele prepara ba rekursu di’ak ba nasaun hodi kompete ba kampu traballu.

Kongresu ne’e, partisipa hosi Ministru Ensinu Superior no Kultura, Longuinhos dos Santos,  Ministru Agrikultura no Peska (MAP), Pedro dos Reis, Prezidente Komisaun Funsaun Públiku (CFP), Faustino Cardoso Gomes, Magnífiku Reitór Universidade Nasional Timor Lorosa’e (UNTL), João Soares Martins, Magnífiku Reitór Institute of Business (IOB), Pedro Ximenes, Diretór Ezekutivu ANAAA, Edmundo Viegas, Diretór Ajénsia Dezenvolvimentu Nasionál (ADN) Renato M. Monteiro da Cruz, Diretora Ezekutiva Laboratóriu Nasionál Saúde, Endang S. da Silva no konvidadu importante sira seluk tan.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here