Komunidade forma resipiente hodi enxe bee-moos iha sulu balun iha munisípiu Baucau. Imajen TATOLI/Natalino Belo

BAUCAU, 21 juñu 2021 (TATOLI)–Xefe suku Bahu, postu Baucau Villa, munisípiu Baucau, Manuel Francisco Rodrigues Gusmão, hateten, daudaun ne’e kontinua implementa Programa Nasionál Dezenvolvementu Suku (PNDS) hodi halo instalasaun bee-mos, reabilita sede suku no Uma Kbiit laek.

“PNDS normalmente la’o nafatin, kona-ba instalasaun bee-mos atu kanaliza ba Makadae-Buile tasi ibun mós la’o ona atinje 50%, ita hein faze daruak atu kompleta 100% no ita hein tama fali ba programa tuir mai hanesan Uma Kbiit Laek no reabiitasaun sede suku,” Xefe suku Bahu hateten ba Agência TATOLI, iha ninia knaar fatin, segunda ne’e.

Kona-ba programa reabilita sedu suku, sei realiza tuir etapa, entaun suku sira sei halo identifikasaun bazeia ba sistema random, ne’ebé faze dahuluk hahú hosi suku ida to’o ramata nia implentasaun.

“Daudaun ne’e, iha parte postu Vemasse no tempu badak iha Triloka, Tirilolo hafoin iha Bahu, ne’ebé fazeadamente,” nia akresenta.

Enkuantu, programa Uma Kbiit Laek iha Bahu sei hahú iha Makadai, ba benefisiáriu uma-kain tolu, ho kategoria uma 37m², ho totál fundu $ 17.000.

Suku Bahu iha área remota, urbana no rurál, tanba dezenvolvementu infraestrutura bázika kuaze kada aldeia seidauk asesu hanesan eletrisidade, bee-mos no estrada.

“Lamegua de’it mak asesu hotu ona, maibé aldeia haat seluk kuaze seidauk, tanba ne’e asesu estrada difikulta transporta produtu lokál ba fatin turizmu no eletrisidade. Ha’u mós sei simu tutan,” nia akresenta.

Orsamentu operasionál hosi PNDS ne’ebé apoia ba jestaun suku iha siklu datoluk hamutuk $7.575,95, ne’ebé osan restu siklu kotuk $1.825,95 no transferénsia subsídiu ba siklu agora $5.750.

Subsídiu infraestrutura siklu datoluk ba projetu estensaun bee-mos iha aldeia Makadai ho valór $49.437,37, ne’ebé osan restu hosi siklu kotuk hamutuk $187,37 no transferénsia subsídiu ba siklu datoluk hosi Governu sentrál $49.250.

Suku Bahu kompostu hosi aldeia lima, kompostu hosi aldeia Ana-ulo, Ro-ulo, Boi-lé, Makadae no Lamegua, ho totál populasaun hamutuk 11.562.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here