Koordenadora UPMA, Brígida Soares. Imajen TATOLI/António Gonçalves

DILI, 21 juñu 2021 (TATOLI)–Koordenadora Unidade Planeamentu, Monitorizasaun no Avaliasaun (UPMA), Brígida Soares, hateten, fatór ne’ebé kontribui ba ezekusaun Orsamentu Jerál Estadu (OJE) 2021 ba liña ministériu kiik, tanba implementasaun Estadu Emerjénsia no Serka Sanitária, ne’ebé prejudika funsionáriu sira atu implementa programa iha terrenu.

“Iha programa no atvidade barak tenke implementa iha nível munisipál iha territóriu tomak, maibé la konsege la’o tanba iha hela faze ida-ne’e, maibé desizaun hosi Konsellu Ministru, funsionáriu hotu tenki hetan ona vasinasaun kompletu atubele implementa programa ho di’ak,” Koordenadora UPMA, informa, hafroin ramata reuniaun ho Primeiru-Ministru (PM), Taur Matan Ruak, iha Rezidénsia Farol, segunda ne’e.

Tanba ne’e, nia enkoraja funsionáriu sira tenki simu vasina kompleta (doze daruak), nune’e bele hetan kartaun vasinasaun atubele la’o lívre hodi ezekuta orsamentu.

“Bainhira entidade hotu hetan ona dokumentu vasinasaun kompleta, sira bele bá munisípiu atu halo serbisu,” nia akresenta.

Aleinde ne’e, nia mós nota katak maski tama ona fulan klaran, maibé ezekusaun foin atinje 30%, tanba implementasaun orsamentu bazeia ba programa ne’ebé foin implementa iha tinan ne’e.

“Ha’u hanoin ida-ne’e afeta, ita haree tanba sá mak kada entidade labele ezekuta? sira tau osan hanesan ne’e, ho target hanesan ne’e, maibé sira la konsege ezekuta,” nia hatutan.

Biban ne’e, Koordenadora UPMA husu ba PM no ninia membru sira halo avaliasaun ba jestór sira, hodi hatene kapasidade jestór sira ezekuta orsamentu bazeia ba programa tuir polítika VIII Governu Konstituisional.

“Ha’u hanoin fasilita tebes públiku no di’ak liu ba Governu, tanba Ministru no Sekretáriu Estadu sira, inklui Primeiru-Ministru rasik bele halo avaliasaun ba jestór iha kada entidade, sera que jestór laiha kapasidade ezekuta ka la ezekuta ne’e liuhosi estrutura bazeia ba programa, ita bele hetan diresaun ida-ne’ebé? Diretór mak sé,” Brígida esplika.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here