Xefe Sentru Saúde Bucoli, Diogo A. R Parada. Imajen TATOLI/Natalino Belo

BAUCAU, 21 juñu 2021 (TATOLI)–Xefe Sentru Saúde Bucoli, Diogo A. R Parada, hateten Sentru Saúde Bucoli kolabora hamutuk ho FALINTIL-Forsa Defeza Timor-Leste (F-FDTL) Komponente Terrestre hodi realiza vasina ba membru hamutuk 250.

“Mai simu doze dahuluk ba membru 67 no simu doze daruak hamutuk 183, ho totál membru 250 simu vasina AstraZeneca,” Xefe Sentru Saúde Bucoli, informa iha Komponente Terrestre Lanud, Baucau, segunda ne’e.

Kampaña vasina AstraZeneca ba liña frente iha Komponente Terrestre Baucau realiza tamba iha kooperasaun di’ak entre Sentru Saúde Bucoli ho Komandante.

“La’o kapas tebes tamba organiza hosi Komandante Terrestre, Tenente Koronel Rineldi Cortereal, ne’ebé orienta no koordena di’ak tebes,” Diogo komenta.

Objetivu hosi vasina hanesan meiu prevensaun atu hasa’e imunidade inklui protoje ema idaidak no família hosi pandemia.

“Ita hotu hatene katak vasinasaun ne’e importante ba ita nu’udar timor-oan,” nia akresenta.

Iha fatin hanesan, Xefe Operasaun Komponente Terrestre F-FDTL, Kapitaun Helio Filipe Dias Quintas, konsidera importante tebes atu membru sira bele hola parte iha kampaña vasinasaun tamba sira halo serbisu defeza hanesan liña frente, nune’e bainhira hala’o serbisu iha ona imunidade no prevene-an hosi COVID-19.

“Tamba Militár liña frente, entaun ami tenki simu tamba ami Komponente Terrestre serbisu iha fronteira barak liu no ao mesmo tempo iha mós postu rua, ida iha Laiwai no Vemasse, entaun obrigatóriu sira tenki simu,” Xefe Operasaun hateten.

Aleinde ne’e, vasina ne’e envolve mós sidadaun sivíl ne’ebé serbisu nu’udar koziñeira no cleaner, inklui família hosi membru rasik.

Komponente Terrestre iha membru 493, ne’ebé maka destakadu hamutuk 114 iha fronteira Bobonaro-Maliana, membru 114 iha Covalima-suai, no postu Vemasse na’in-10 inklui Laiwai na’in-10.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here