Komandante PNTL RAEOA Superintendente Xefe Mateus Mendes. Imajen Tatoli/Abilio Elo Nini.

OÉ-CUSSE, 21 juñu 2021 (TATOLI)—Polisia Nacionál Timor-Leste (PNTL) iha Rejiaun Administrativa Espesiál Oé-Cusse Ambeno (RAEOA) preparadu atu simu vasina AstraZeneca doze daruak nian.

“Ami PNTL iha Oé-Cusse prontu, laiha problema. Ami preparadu atu simu vasina AstraZeneca doze daruak,” Komandante PNTL RAEOA Superintendente Xefe Mateus Mendes informa ba Ajênsia TATOLI iha nia servisu fatin, bairru Santa Rosa, segunda ne’e

Iha vasina doze dahuluk, nia informa, membru PNTL na’in-21 mak seidauk simu vasina tanba sira-nia kondisaun saúde la permite maibé membru sira seluk hamutuk 139 ne’e simu ona vasina AstraZebeca doze dahuluk no agora bein lansamentu ba doze daruak nian.

“Sira na’in-21 mak seidauk simu vasina doze dahuluk nian, maibé agora ne’e sira bele simu ona doze dahuluk tanba kondisaun saúde di’ak ona. Memnbru PNTL sira seluk ne’e, hein atu simu tan vasina doze daruak nian,” nia dehan.

Durante estadu emerjénsia no serka sanitaria ne’e, nia informa, situasaun seguransa iha RAEOA la’o hanesan babain tanba koordenasaun entre PNTL, autoridade sira liuliu autoridade RAEOA no autoridade rejionál, autoridade lokál, no ekipa saúde la’o di’ak tanba objetivu ida mak servisu hamutuk luta atu kombate COVID-19 iha RAEOA.

“Seguransa nia prezensa ne’e atu ezekuta programa Estadu nian. La halo buat seluk, misaun PNTL nian mak saida mak Estadu deside, PNTL iha ne’ebá hodi hala’o lei no orden,” nia hateten.

Total membrus PNTL iha RAEOA, hamutuk 139, kompostu hosi esquadra (4) mak hanesan eskuadra Pante Makasar, eskuadra Oésilo, eskuadra Pasabe no eskuadra Nitibe.

Jornalista : Abilio Elo Nini

Editór      : Cancio Ximenes

HAKEREK NO HATÁN

Please enter your comment!
Please enter your name here