Depuatdo PLP, Noe da Silva Ximenes. Imajen Tatoli/Egas Cristovão.

DILI, 21 juñu 2021 (TATOLI)—Reprezentante povu iha uma fukun Parlamentu Nasionál (PN) husu Governu liuhosi Ministériu Finansa no Ministériu Saúde atu rezolve problema pasiente Timor-oan sira-ne’ebé halo hela tratamentu iha Singapura no Indonézia, tanba dezde marsu to’o oras ne’e seidauk simu subsídiu tratamentu nian.

“Tuir informasaun ne’ebé ami simu katak ita-nia pasiente sira-ne’ebé oras ne’e halo hela tratamentu iha Singapura no Indonézia, seidauk simu subsídiu tratamentu nian dezde fulan-marsu to’o ohin loron,” membru Parlamentu Nasionál, Deputadu Noé da Silva Ximenes, levanta liuhosi plenária, segunda ne’e.

Deputadu Bankada Partidu Libertasaun Populár (PLP) ne’e husu Governu konsidera asuntu ne’e atubele fó solusaun ho urjente, tanba tuir informasaun ne’ebé nia simu hosi adidu saúde iha Indonézia katak prosesu ne’e la’o hela maibé prosesu ne’e iha hela Ministériu Finansa no Ministériu Saúde.

“Tanba ne’e mak ami husu oinsá mak bele prosesa lalais situasaun ida-ne’e hodi labele difikulta ita-nia pasiente sira no ita-nia sidadaun sira-ne’ebé mak halo hela tratamentu iha fatin rua ne’e,” nia propoin.

Hatán ba kestaun ne’e, Ministru ba Asuntu Parlamentár no Komunikasaun Sosiál (MAPKOMS) Francisco Jerónimo, sei enkamiña kestaun ne’e ba ministériu relevante.

Governu liuhosi Minsitériu Saúde, kada tinan prevee orsamentu millaun $6 ba pasiente Timor-oan sira ne’ebé halo tratamentu sáude iha rai-li’ur.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here